ಗ್ರ್ಯಾಂಡ್ ಟಿಟಾನ್ ರಾಷ್ಟ್ರೀಯ ಉದ್ಯಾನ ಸುಮಾರು 3,10,000 ಎಕರೆ ಪ್ರದೇಶಕ್ಕೆ ಆವರಿಸಿದೆ… ಪರ್ವತಗಳು, ಸರೋವರಗಳು, ಬಯಲು, ಟಿಟಾನ್ ಪರ್ವತಗಳ ದೊಡ್ಡ ಶಿಖರಗಳು ಮತ್ತು ಜಾಕ್ಸನ್ ಹೋಲ್ ಕಣಿವೆಯ ಉತ್ತರಾರ್ಧ ಭಾಗದಿಂದ ಕೂಡಿದೆ. ಗ್ರ್ಯಾಂಡ್ ಟಿಟಾನ್ ಉದ್ಯಾನದಲ್ಲಿ ಸಿಹಿ ನೀರ ಸರೋವರಗಳಿವೆ. ಇದೀಗ ಭೇಟಿಮಾಡಿದ ಸರೋವರದ ಹೆಸರು, "ಜೆನ್ನಿ ಲೇಕ್.” ಪಕ್ಕದಲ್ಲೇ ಇರುವ ಟಿಟಾನ್ ಪರ್ವತಶ್ರೇಣಿಯಿಂದ ಹಿಮ ಕರಗಿದ ನೀರು ಸರೋವರಕ್ಕೆ ಹರಿದು ಬರುತ್ತದೆ. ಇದಲ್ಲದೆ… ಇನ್ನೂ ಎರಡು ಸರೋವರಗಳು ಇವೆ… "ಲೆಯ್ಹ್ ಲೇಕ್" ಮತ್ತು "ಜಾಕ್ಸನ್ ಲೇಕ್.” ಸರೋವರದಲ್ಲಿ ಪ್ರವಾಸಿಗರಿಗೆ ದೋಣಿವಿಹಾರ ಮಾಡಲು ವ್ಯವಸ್ಥೆಯಿದೆ. ಪ್ರವಾಸಿಗರು ಮೋಟಾರು ದೋಣಿಗಳನ್ನು ಉಪಯೋಗಿಸಿ ನೀರಮೇಲಿನ ಸ್ಕೀಯಿಂಗ್ ಆಟವನ್ನೂ ಆಡುತ್ತಾರೆ. ನಡಿಗೆ ಪ್ರಿಯರು ಪರ್ವತದಲ್ಲಿ ಗೈಡ್ ಸಹಿತ ಕಾಲುನಡಿಗೆ ಹೋಗುತ್ತಾರೆ. ಅನುಭವವಿರುವ ಸ್ವಯಂ ಗುಂಪುಗಳು ತಾವೇ ಕಾಲುನಡಿಗೆ ಹೋಗುತ್ತಾರೆ. ಧೈರ್ಯದ ಮೇಲೆ ಒಬ್ಬಂಟಿಗರೇ ಗೈಡ್ ಇಲ್ಲದೆ ನಡಿಗೆ ಹೋಗುತ್ತಾರೆ. ಆದರದು ಅಪಾಯಕ್ಕೆ ಮುನ್ಸೂಚನೆ. ಈ ಬೇಸಗೆಯಲ್ಲಿ(2021ರ ಜೂನ್ 8ರಂದು) ಒಬ್ಬನೇ ನಡಿಗೆಹೋದ ವ್ಯಕ್ತಿಯೊಬ್ಬ ಕಣ್ಮರೆಯಾಗಿರುವುದು ವರದಿಯಾಗಿದೆ… a missing Grand Tetons hiker, 27-year-old Cian McLaughlin, ರಾಷ್ಟ್ರೀಯ ಉದ್ಯಾನದ ಸೇವಾ ಸಿಬ್ಬಂದಿಗೆ ಇನ್ನೂ ಸಿಕ್ಕಿಲ್ಲವೆಂಬ ಮಾಹಿತಿ ಇದೆ. ಒಬ್ಬರೇ ಕಾಲುನಡಿಗೆ ಹೋಗುವಂತಹ ವ್ಯಕ್ತಿಗಳು, ಸರ್ವೇ ಸಾಮಾನ್ಯವಾಗಿ ಉದ್ಯಾನದಲ್ಲಿ ಅಲೆದಾಡುವ grizzly ಗ್ರಿಜ಼್ಲಿ ಕರಡಿಗಳಿಗೆ ತುತ್ತಾಗುವ ಸಾಧ್ಯತೆಯಿರುತ್ತದೆ. ಪೂರ್ಣ ಪ್ರಮಾಣದ ನೋಟಗಳಿಗಾಗಿ ನಾವು ಉದ್ಯಾನದಲ್ಲಿ ಸರೋವರದ ತೀರದಲ್ಲಿ ಸುತ್ತಾಡಿದೆವು. ಒಬ್ಬರಿಗೊಬ್ಬರು ಛಾಯಾಚಿತ್ರಗಳನ್ನು ತೆಗೆದುಕೊಂಡೆವು. ಸಿಂಚನ, ಮರದ ಮೇಲೆ ಹಣ್ಣು ತಿನ್ನುತ್ತಾ ಕುಳಿತಿದ್ದ ಅಳಿಲೊಂದರ ಚಿತ್ರವನ್ನೂ ತೆಗೆದುಕೊಂಡಳು.
ಮುಂದೆ ದಾರಿಯಲ್ಲಿ ಒಂದು ಕಡೆ ಎಡಪಕ್ಕದಲ್ಲಿ ಕಾರುಗಳ ಪಾರ್ಕಿಂಗ್ ಸ್ಥಳವಿದ್ದಿತು. ಇಲ್ಲಿ ಕಾರುಗಳನ್ನು ನಿಲ್ಲಿಸಿ ಪ್ರವಾಸಿಗರು "ಗ್ರ್ಯಾಂಡ್ ಟಿಟಾನ್ ಪರ್ವತಶ್ರೇಣಿ"ಯನ್ನು ವೀಕ್ಷಿಸುತ್ತಿದ್ದರು. ಇಲ್ಲಿಗೆ ಗ್ರ್ಯಾಂಡ್ ಟಿಟಾನ್ ಪರ್ವತಶ್ರೇಣಿಯ ಉದ್ದಗಲದ ಪೂರ್ಣವಾದ ನೋಟವು ಸಿಗುತ್ತಿತ್ತು. ಹಾಗಾಗಿ ಪ್ರವಾಸಿಗರು ಇಲ್ಲಿ ನಿಂತು ವೀಕ್ಷಣೆ ನಡೆಸಿದ್ದರು. ನಾವೂ ಕೂಡ ಕಾರು ನಿಲ್ಲಿಸಿ ಒಂದ್ಹದಿನೈದು ನಿಮಿಷ ವೀಕ್ಷಿಸಿ ಚಿತ್ರಗಳನ್ನು ತೆಗೆದುಕೊಂಡು ಹೊರಟೆವು.
ಮುಂದಿನ ನಮ್ಮ ಪ್ರಯಾಣ "ಯೆಲ್ಲೊಸ್ಟೋನ್ ರಾಷ್ಟ್ರೀಯ ಉದ್ಯಾನ"ದ ಕಡೆಗೆ. ಯೆಲ್ಲೊಸ್ಟೋನ್ ಉದ್ಯಾನ ಐದು ಪ್ರವೇಶ ದ್ವಾರಗಳನ್ನು ಹೊಂದಿದೆ. ನಾವು ಹೋಗುತ್ತಿದ್ದುದು ದಕ್ಷಿಣದ ದ್ವಾರದ ಕಡೆಯಿಂದ. ವೈಯೊಮಿಂಗ್ ರಾಜ್ಯದಲ್ಲಿ ಎರಡು ದ್ವಾರಗಳಿವೆ, ಪೂರ್ವ ಮತ್ತು ದಕ್ಷಿಣ ದ್ವಾರಗಳು, ಉಳಿದ ಮೂರು ದ್ವಾರಗಳು ಮೊಂಟಾನ ರಾಜ್ಯದ ಕಡೆಯಿಂದ… ಈಶಾನ್ಯ, ಉತ್ತರ ಮತ್ತು ಪಶ್ಚಿಮ ದ್ವಾರಗಳು. ಪೂರ್ವದ ದ್ವಾರ… "ಕೋಡಿ" ನಗರದ ಕಡೆಯಿಂದ… ದಕ್ಷಿಣದ ದ್ವಾರ "ಜಾಕ್ಸನ್" ಪಟ್ಟಣದ ಕಡೆಯಿಂದ… ನಾವೀಗ ಹೋಗುತ್ತಿರುವ ರಸ್ತೆ. ಸ್ನೇಕ್ ನದಿಯ ಆಸು ಪಾಸಿನಲ್ಲಿಯೇ ಮುಂದೆಸಾಗುವ ರಸ್ತೆಯಲ್ಲಿ ನಾವು ಉಳಿದೆರಡು ಸರೋವರಗಳನ್ನು ದಾಟಿ ಮುಂದೆ ಹೋಗಬೇಕು. "ಲೆಯ್ಹ್ ಲೇಕ್," ರಸ್ತೆಗೆ ಕಾಣಿಸುವುದಿಲ್ಲ. ಜಾಕ್ಸನ್ ಸರೋವರ, ದೊಡ್ಡ ಸರೋವರ. ಸರೋವರದಿಂದ ಸ್ನೇಕ್ ನದಿಗೆ ಹರಿದು ಹೋಗುವ ಹೆಚ್ಚುವರಿ ನೀರನ್ನು ನಿಯಂತ್ರಿಸಲು ಅಣೆಕಟ್ಟೆಗೆ ನಿರ್ಮಿಸುವ ಹಾಗೆ ನಿಯಂತ್ರಣ ದ್ವಾರಗಳನ್ನು ನಿರ್ಮಿಸಿರುತ್ತಾರೆ. ಅಲ್ಲಿಯೂ ಕೂಡ ಪ್ರವಾಸಿಗರಿಗೆ ದೋಣಿ ವಿಹಾರ ಮತ್ತು ನೀರಾಟಗಳಾಡಲು ವ್ಯವಸ್ಥೆಯಿದೆ. ಅಣೆಕಟ್ಟೆಯ 33 ಅಡಿಗಳಷ್ಟೆತ್ತರದಷ್ಟು ನೀರನ್ನು ಐಡಾಹೊ ರಾಜ್ಯದ ರೈತರ ವ್ಯವಸಾಯಕ್ಕಾಗಿ ಹರಿಯಬಿಡಲಾಗುತ್ತದೆ. ನಾವು ಈ ಸರೋವರ ನೋಡಲು ನಿಲ್ಲಲಿಲ್ಲ, ಮುಂದುವರಿದೆವು.
ಯೆಲ್ಲೊಸ್ಟೋನ್ ರಾಷ್ಟ್ರೀಯ ಉದ್ಯಾನ ಹುಡುಕಿಕೊಂಡು:![](https://blogger.googleusercontent.com/img/b/R29vZ2xl/AVvXsEhycPDhJZpVbHj52o8bcg0kOJ9bLExhPklSWnYMb2P4OGTTk2rK2ouamziIXeiuGKLAVol_UF6XMFLBX7scuUDWRzc83b1OQppza6nZiiX_JAhbztVpwef3AqxqEkzo9eJhiCPs6Oa1rtgfXyiKVzwqYJncXMwzAjMw1tVJpXBN83oXBdhNa_-WhaZD6A/s320/DSC_0300%20(1).JPG) |
ಓಲ್ಡ್ ಫ಼ೇತ್ಫು಼ಲ್ ಇನ್ |
ಯೆಲ್ಲೊಸ್ಟೋನ್ ರಾಷ್ಟ್ರೀಯ ಉದ್ಯಾನದ ಪ್ರವೇಶ ದ್ವಾರದಲ್ಲಿ ಪ್ರವೇಶ ಶುಲ್ಕ ಪಾವತಿಸಿ ಪ್ರವೇಶಿಸಬೇಕು. ಚಿನ್ಮಯಿ, ಸ್ನೇಹಿತರೊಬ್ಬರಿಂದ ಪಡೆದು ತಂದಿದ್ದ, ರಾಷ್ಟ್ರೀಯ ಉದ್ಯಾನಗಳಿಗೆ ಮೊದಲೇ ವಾರ್ಷಿಕ ಶುಲ್ಕ ಪಾವತಿಸಿದ, ಪಾಸ್ ಇದ್ದಿತು. ಅದನ್ನು ದ್ವಾರದಲ್ಲಿ ದಾಖಲಿಸಿ ಪ್ರವೇಶ ಪಡೆದೆವು. ಉದ್ಯಾನವು ಹತ್ತಿರವಾದಂತೆ ಕಾಡಿಗೆ ಅಲ್ಲಲಿ ಬೆಂಕಿ ಬಿದ್ದಿದೆಯೆಂದೆನಿಸುತ್ತಿತ್ತು! ಯಾಕಂದರೆ ಕಾಡ್ಗಿಚ್ಚಿನಿಂದ ಮೇಲೆದ್ದು ಬಂದ ದಟ್ಟ ಹೊಗೆಯ ಮೋಡಾಕೃತಿಗಳು ಅಲ್ಲಲ್ಲಿ ಹರಡಿದಂತೆ ಇದ್ದಿತು. ಹತ್ತಿರ್ಹತ್ತಿರ ಹೋದಂತೆ ಗೊತ್ತಾಯಿತು… ಅದು ಕಾಡ್ಗಿಚ್ಚಿನಿಂದಾಗಿ ಹೊರಟ ಹೊಗೆಯಲ್ಲವೆಂದು. ಉದ್ಯಾನದ ತುಂಬಾ "ಬುಸ್ಬುಸ್" ಎಂದು ಬುಸುಗುಡುತ್ತಾ ತುಂಬಿಕೊಂಡಿರುವ ಬಿಸಿನೀರ ಬುಗ್ಗೆ(ಗೀಜ಼ರ್/ಗೈಜ಼ರ್)ಗಳಿಂದ ಹೊರಡುತ್ತಿದ್ದ ಮೋಡದಾಕಾರದ ಬಿಸಿನೀರ ಹಬೆ! ಎಲ್ಲಿಯೂ ರಸ್ತೆಬಿಟ್ಟು ಪಕ್ಕಕ್ಕೆ ಸರಿದು ಕಾರುಗಳು ಹೋಗುವಂತಿರಲಿಲ್ಲ. ಉದ್ಯಾನದ ಮೇಲ್ವಿಚಾರಣಾ ಅಧಿಕಾರಿಗಳು ನಿಗದಿಪಡಿಸಿ ಹಾಕಿದ್ದ ರಸ್ತೆಗುರುತುಗಳೊಳಗೇ ಹೋಗಬೇಕಿದ್ದಿತು. ಒಮ್ಮೆ ಎಡಬಲ ದಾರಿ ತಪ್ಪಿದ ಚಿನ್ಮಯಿ ಸುತ್ತುವರಿದು ಬಂದು ತಲುಪಬೇಕಾಗಿದ್ದ ಸ್ಥಳಕ್ಕೆ ಹೋಗಿ ಕಾರನ್ನು "ಓಲ್ಡ್ಫ಼ೇತ್ಫು಼ಲ್ ಇನ್"ನ ವಾಹನ ನಿಲ್ದಾಣದಲ್ಲಿ ನಿಲ್ಲಿಸಿದಳು. ಸಮಯ ಮಧ್ಯಾಹ್ನ 2.47 ಗಂಟೆ.
"ಯೆಲ್ಲೊಸ್ಟೋನ್ ರಾಷ್ಟ್ರೀಯ ಉದ್ಯಾನ", ಸುಮಾರು 3500 ಚದುರ ಮೈಲಿಗಳವರೆಗೆ ಮೂಲತಹ ವೈಯೊಮಿಂಗ್ ರಾಜ್ಯದ ಟಿಟಾನ್ ಕೌಂಟಿ ಮತ್ತು ಪಾರ್ಕ್ ಕೌಂಟಿಗಳಲ್ಲಿ ಹಂಚಿಕೊಂಡಿದ್ದು ನಂತರ ಪಕ್ಕದ ರಾಜ್ಯಗಳಾದ ಮೊಂಟಾನ ಮತ್ತು ಐಡಾಹೊ ರಾಜ್ಯಗಳಿಗೆ ವಿಸ್ತರಿಸಿಕೊಂಡಿರುವ ಅಮೆರಿಕದ ಬಹುದೊಡ್ಡ ಮತ್ತು ಹೆಸರುವಾಸಿ ಉದ್ಯಾನ. ಮಾನವ ಜೀವನದ ಸೆಳೆತಕ್ಕೆ ಒಳಗಾದ 11,000 ವರ್ಷಗಳ ಇತಿಹಾಸ ಹೊಂದಿದೆ. ಅಮೆರಿಕದ ಶೊಶೋನ್ ಬುಡುಕಟ್ಟು(ಅಮೆರಿಕನ್ ಇಂಡಿಯನ್ನರು) ಜನಾಂಗವು ಈ ಭೂ ವ್ಯಾಪ್ತಿಯಲ್ಲಿ ಪ್ರಾಣಿಗಳ ತುಪ್ಪಳ ಸಂಗ್ರಹಣೆಗಾಗಿ ಹುಡಕಾಟ ನಡೆಸಿದ ಕುರುಹುಗಳು/ಚರಿತ್ರೆಗಳು, ಇಲ್ಲಿ ಸಿಗುವ ಮಾಹಿತಿಯಲ್ಲಿ ದಾಖಲಿಸಲಾಗಿದೆ. ಮೊದಲ ನೋಟಕ್ಕೆ ನನಗೆ ಅನಿಸಿದ್ದು… ಇದೊಂದು "ಕ್ಷುದ್ರ ಕಾಪಾಲಿಕನ ಮಾಯಾಲೋಕದ ಅಡ್ಡೆ...” ಎಂದು.
![](https://blogger.googleusercontent.com/img/b/R29vZ2xl/AVvXsEg-S8gxdC_hJ9uggu7HUlno8u6-zaS-rk_cx3L1RAu1uuc5fzMFhIbV1hWejeU3ULpTOtVfAvfqiTNiCtbhu9o54CdOyrAirc6exLMJEIK5F-HVKeRioh2WOYWPr-_c7h8xs3dtTakk9U1XOCd2R7Bx8vc79u7o19HTzxo8EE3cuF5AYI87HLloJpH8Kw/s320/DSC_0302.JPG) |
ಫ಼ೈರ್ಹೋಲ್ ನದಿ ದಂಡೆಯಲ್ಲಿನ ನೋಟ |
ಅಮೆರಿಕ ಸರ್ಕಾರ, ಮಾರ್ಚ್ 1, 1872ರಲ್ಲಿಯೇ ಇದನ್ನು "ಪ್ರಪ್ರಥಮ ರಾಷ್ಟ್ರೀಯ ಉದ್ಯಾನ" ಎಂದು ಘೋಷಿಸಿದೆ. ಅಷ್ಟೇಕೆ, ಪ್ರಪಂಚದಲ್ಲಿಯೇ ಮೊದಲ ರಾಷ್ಟ್ರೀಯ ಉದ್ಯಾನ ಎಂಬ ಹೆಗ್ಗಳಿಕೆ ಬೇರೆ. ಇದು, 2.2 ಮಿಲಿಯನ್ ಎಕರೆಗಳಿಗೂ ಅಧಿಕ ಭೂಮಿ- ಯನ್ನು ಆವರಿಸಿಕೊಂಡಿದೆ, ಬಹುತೇಕ ಭೂಮಿ, ರಸ್ತೆಗಳಿಗೆ ನಿಲುಕದ್ದಾಗಿದೆ. ಒಬ್ಬ ಮನುಷ್ಯ ತನ್ನ ಜೀವಿತಾವದಿಯಲ್ಲಿ ಇದರ ವೀಕ್ಷಣೆ ನಡೆಸಿ ಅನುಭವಿಸಲಿಕ್ಕಾಗುವುದಿಲ್ಲ?! ಅಷ್ಟೊಂದು ಅಗಾಧವಾಗಿದೆ.
ಯೆಲ್ಲೊಸ್ಟೋನ್ ರಾಷ್ಟ್ರೀಯ ಉದ್ಯಾನ, ಒಂದು ಬುಸುಗುಡುತ್ತಾ ಅರೆನಿದ್ರಾವಸ್ಥೆಯಲ್ಲಿರುವ ಅಮೆರಿಕದ ಬಹುದೊಡ್ಡ, ಜೀವಂತ, ಶಕ್ತಿಯುತ ಜ್ವಾಲಾಮುಖಿ. ಇದನ್ನು ಎರಡು ಭಾಗಗಳಾಗಿ ವಿಭಾಗಿಸಿದೆ, ಮೇಲ್ದಂಡೆ ಕಟ್ಟೆ ಮತ್ತು ಕೆಳದಂಡೆ ಕಟ್ಟೆ(ಅಪ್ಪರ್ ಬೇಸಿನ್ ಮತ್ತು ಲೋವರ್ ಬೇಸಿನ್). ನಾವು ಇದೀಗ ಕಾರು ನಿಲ್ಲಿಸಿದ "ಓಲ್ಡ್ ಫ಼ೇತ್ಫು಼ಲ್ ಇನ್" ಇರುವುದೇ ಅಪ್ಪರ್ ಬೇಸಿನ್ನಲ್ಲಿ. ಪ್ರಪಂಚದ ಬಹುಸಂಖ್ಯೆಯ ಗೈಜ಼ರುಗಳು ಇರುವುದೇ ಈ ಮೇಲ್ದಂಡೆ ಕಟ್ಟೆಯಲ್ಲಿ. ಇಲ್ಲಿ ಕೇಂದ್ರೀಕೃತವಾಗಿರುವ ಹೈಡ್ರೋತರ್ಮಲ್ ವೈಶಿಷ್ಟ್ಯಗಳು ಯೆಲ್ಲೊಸ್ಟೋನ್ನಲ್ಲಿರುವ ಜ್ವಾಲಾಮುಖಿ ಕ್ರಿಯಾಶೀಲವಾಗಿ ಜೀವಂತವಾಗಿದೆಯೆಂಬುದಕ್ಕೆ ಸಾಕ್ಷ್ಯಗಳನ್ನು ಒದಗಿಸುತ್ತದೆ. ದಿನವಹಿ, ಪಾತಾಳದಲ್ಲಿನ ಜ್ವಾಲಾಮುಖಿಯ ಉಷ್ಣಾಂಶದಲ್ಲಾಗುವ ಏರಪೇರುಗಳನ್ನು ಅಮೆರಿಕದ ಭೂಗರ್ಭ ಸರ್ವೇಕ್ಷಣ ವಿಜ್ಞಾನಿಗಳು(USGS) ಅಳೆಯುತ್ತಾ ಕುಳಿತಿದ್ದಾರೆ ಇಲ್ಲಿ. ಯೂಟ ರಾಜ್ಯ ವಿಶ್ವವಿದ್ಯಾಲಯದ ಭೂಗರ್ಭಶಾಸ್ತ್ರ ವಿಜ್ಞಾನಿಗಳು, "ಈ ಜ್ವಾಲಾಮುಖಿ ಯಾವಾಗ ಬೇಕಾದರೂ ಸ್ಫೋಟಗೊಳ್ಳಬಹುದೆಂದು?!" ತಿಳಿದು ಕಾಯುತ್ತಿದ್ದಾರೆ, ಇನ್ನೊಂದೆಡೆ.
ಯೆಲ್ಲೊಸ್ಟೋನ್ ಒಂದು "ಕಾಲ್ಡೆರ":ಯೆಲ್ಲೊಸ್ಟೋನ್ ಒಂದು ಅತ್ಯದ್ಭುತ ಜ್ವಾಲಾಮುಖಿಯ "ಕಾಲ್ಡೆರ"… ಸುಮಾರು 640,000 ವರ್ಷಗಳ ಹಿಂದೆ ಅತ್ಯಾದ್ಭುತ ಜ್ವಾಲಾಮುಖಿಯ ಸ್ಫೋಟದಿಂದ ಖಾಲಿಯಾದ ಮ್ಯಾಗ್ಮ ಚೇಂಬರಿನೊಳಕ್ಕೆ ಭೂಕುಸಿತದಿಂದಾದ ಕ್ರೇಟರ್(ದೊಗರು / ದೊಡ್ಡ ತಗ್ಗು ). ಈ ದೊಗರಿನ ಅಗಲ 35 ಮೈಲಿಗಳು ಮತ್ತು ಉದ್ದ 45 ಮೈಲಿಗಳು ಎಂದು ಅಂದಾಜಿಸಲಾಗಿದೆ. ಇಲ್ಲಿ ಜ್ವಾಲಾಮುಖಿಯ ಮ್ಯಾಗ್ಮ ಭೂಮಟ್ಟದಿಂದ 4.2 ಮೈಲಿಗಳ ಆಳದಲ್ಲಿ ಕುಳಿತಿದೆ… ಸಾಮಾನ್ಯವಾಗಿ ಅದು 18.2 ಮೈಲಿಗಳ ಆಳದಲ್ಲಿರುತ್ತದೆಯೆಂದು ವಿಜ್ಞಾನಿಗಳ ನಂಬುಗೆ. ಈ ಕಾರಣ, ಯೆಲ್ಲೊಸ್ಟೋನ್ ನಲ್ಲಿ 200 ಗೈಜ಼ರುಗಳು ಮತ್ತು 10,000ಕ್ಕೂ ಅಧಿಕ ಹೈಡ್ರೊತರ್ಮಲ್ ವೈಶಿಷ್ಟ್ಯಗಳಿವೆ… ಗೈಜ಼ರುಗಳು, ಬಿಸಿನೀರ ಬುಗ್ಗೆಗಳು, ಕೆಸರು ಬುಗ್ಗೆಗಳು, ಅನಿಲ ರಂದ್ರಗಳು ಮತ್ತು ನೀರಾವಿ ಬಾಯಿಗಳು… ಒಟ್ಟು ಭೂಮಿಯ ಮೇಲಿರುವುದರ ಶೇಕಡ 62 ಭಾಗ ಯೆಲ್ಲೊಸ್ಟೋನ್ನಲ್ಲಿವೆಯೆಂದು ಒಂದು ಅಂದಾಜು.
ಪ್ರಪಂಚದಲ್ಲಿರುವ ಅರ್ಧಭಾಗದ ಹೈಡ್ರೊತರ್ಮಲ್ ವೈಶಿಷ್ಟ್ಯಗಳನ್ನು ಇಲ್ಲಿ ನಾವು ಕಾಣಬಹುದು, 10,000ಕ್ಕೂ ಅಧಿಕವಾದ ವೈಶಿಷ್ಟ್ಯಗಳಿವೆ ಎಂಬುದೊಂದು ಅಂದಾಜು… ಬಿಸಿನೀರ ಬುಗ್ಗೆಗಳು, ಮಡ್ಪಾಟ್ಸ್, Fumaroles… ನೆಲದೊಳಗಿನಿಂದ ಬುಸುಗುಡುತ್ತಾ ಅನಿಲವನ್ನು ಹೊರಹಾಕುವ ರಂದ್ರಗಳು… ಸಾಮಾನ್ಯವಾಗಿ ಜ್ವಾಲಾಮುಖಿಯ ಅನಿಲಗಳಾದ ಗಂಧಕದ ಡೈಆಕ್ಸೈಡ್, ಕಾರ್ಬನ್ ಡೈಆಕ್ಸೈಡ್, ಹೈಡ್ರೊಜನ್ ಕ್ಲೋರೈಡ್/sulphide ಜೊತೆಗೆ ನೀರಾವಿಯನ್ನು ಹೊರಹಾಕುವ ರಂದ್ರಗಳು, ಬಿರುಕುಗಳು… ಇವುಗಳು ಕ್ರಿಯಾಶೀಲವಾಗಿರುವ ಜ್ವಾಲಾಮುಖಿ ಅಥವಾ ಭೂಮಿಯ ಮೇಲ್ಪದರದವರೆಗೆ ಸ್ಫೋಟಗೊಳ್ಳದೆ ಏರಿಬಂದಿರುವ ಮ್ಯಾಗ್ಮ ಇರುವಂಥ ಸ್ಥಳಗಳಲ್ಲಿ ಉಂಟಾಗಿರುತ್ತವೆ. ಭೂಮಿಯೊಳಗಣ ಶಾಖೋತ್ಪನ್ನವನ್ನವಲಂಬಿಸಿ ಅವುಗಳು ಶತಮಾನಗಳಷ್ಟು ಕಾಲ ಜೀವಂತವಾಗಿರುವ ಸಾಧ್ಯತೆಯಿರುತ್ತದೆ ಅಥವಾ ಬೇಗನೆ ಒಣಗಿಹೋಗಲೂ-ಬಹುದು. ಟ್ರ್ಯಾವರ್ಟೈನ್ ಟೆರೇಸಜ಼್, ಮತ್ತಿನ್ನೂ ಗೈಜ಼ರುಗಳ ಬಗ್ಗೆ ಹೇಳಲೇಬೇಕಾಗಿಲ್ಲ. Thermophiles(ತರ್ಮೊಫ಼ೈಲ್ಜ಼್), ಶಾಖವನ್ನು ಪ್ರೀತಿಸುವ ಅಣುಜೀವಿಗಳು ಈ ವೈಶಿಷ್ಟ್ಯಗಳಲ್ಲಿ ವಾಸಿಸುತ್ತವೆಯಲ್ಲದೆ ಅಂತಹ ಬುಗ್ಗೆಗಳಿಗೆ ವಿಶೇಷ ಗಾಢವಾದ ಬಣ್ಣಗಳನ್ನು ತುಂಬಿರುತ್ತವೆ. Thermophiles, ಇವು ಡಾರ್ವಿನ್ನನ ಜೀವವಿಕಾಸದ ಸಿದ್ಧಾಂತಗಳಿಗೆ ಪುಷ್ಠಿ ನೀಡುತ್ತವೆ ಇಲ್ಲಿ. ಉದಾ: ಮಿಡ್ವೇ ಗೈಜ಼ರ್ ಕಟ್ಟೆಯಲ್ಲಿರುವ ಗ್ರ್ಯಾಂಡ್ ಪ್ರಿಜ್ಮಾ಼ಟಿಕ್ ಬುಗ್ಗೆ, (grand prismatic spring) ಇದರ ಬಗ್ಗೆ ಪುನಃ ಮುಂದೆ ಬರೆದಿದೆ.
![](https://blogger.googleusercontent.com/img/b/R29vZ2xl/AVvXsEg7vRuNQSz4vr3JZxyZUn1kMmZJFqKvuGZ0lVao17wzyTIctB4bQ1EcZZlCOQfbppCmBUAcIsOZ3IrKTbcKdUpGGbveXKiH8hs-RMeUB72Ofa9IAtjVEI7lIWdZhlOJYLrUW0R3HKWOTOVyCx-cQJo-_7FbmpbzOPs-c74AwKyj83gK-VLMH5fyKsl-Pw/s320/DSC_0328.JPG) |
ಓಲ್ಡ್ ಫ಼ೇತ್ಫ಼ುಲ್ ಗೈಜ಼ರ್-ದೂರದಿಂದ |
![](https://blogger.googleusercontent.com/img/b/R29vZ2xl/AVvXsEisQzRuJxQo_RRWtYAWgeEARqbJjnRXht1muEo7s1htnp28LoL0z53qaDvxp82QWF5uQucb8ZQnOrDMHDDpUlGEgfxvqmG_Mokg8IHwJT1RIF51_dNDnvJ7XZJ-X8BrarT3eYttpMaGXKpfVnfm251xBGB2aoeHMaKkyXw0zHXWUgoEHIVBBMTiti6DZQ/w320-h219/DSC_0342.JPG) |
ಓಲ್ಡ್ ಫ಼ೇತ್ಫ಼ುಲ್ ಗೈಜ಼ರ್- ಹತ್ತಿರದ ದೃಶ್ಯ |
ಓಲ್ಡ್ ಫ಼ೇತ್ಫು಼ಲ್ ಗೈಜ಼ರ್:
ನಾವು ಕಾರು ನಿಲ್ಲಿಸಿ ಹೊರ ಬರುವ ವೇಳೆಗೆ ಸರಿಯಾಗಿ ಓಲ್ಡ್ ಫ಼ೇತ್ಫು಼ಲ್ ಗೈಜ಼ರ್ ತನ್ನ ಕಾರಂಜಿ ಉಗಿತವನ್ನು ಆಗತಾನೆ ಕಡಿಮೆಗೊಳಿಸುತ್ತಿತ್ತು. ಈ ಗೈಜ಼ರ್ 1870ನೇ ಇಸವಿಯಿಂದ್ಹಿಡಿದು ಒಂದು ನಿರ್ಧಿಷ್ಟ ಅವದಿಯಲ್ಲಿ ನಿಯಮಿತವಾಗಿ ಸಿಡಿದುಗಿಯಲು ಪ್ರಾರಂಬಿಸುತ್ತದೆ. ಇತ್ತೀಚಿನ ದಶಕಗಳಲ್ಲಿ ಅದರ ಉಗಿತ ಚಿಮ್ಮುವಿಕೆಯ ಆವರ್ತನದಲ್ಲಿ ಇಳಿಕೆಯಾಗಿದೆಯೆಂದು ಮಾಹಿತಿಯಿದೆ. ಆದಾಗ್ಯೂ ಅದೀಗ ಗಂಟೆಗೊಮ್ಮೆ ± ಹತ್ತು ನಿಮಿಷಗಳ ವ್ಯತ್ಯಾಸದಲ್ಲಿ ದಿನದ 24 ಗಂಟೆಗಳಲ್ಲಿ 17 ಆವರ್ತಗಳಲ್ಲಿ ಚಿಮ್ಮುತ್ತದೆಂದು ಯೆಲ್ಲೊಸ್ಟೋನ್ ಮಾಹಿತಿ ಕೇಂದ್ರದಲ್ಲಿ ಧಾಖಲಿಸಿದೆ. ಇದರ ಕಾರಂಜಿ ಉಗಿತದ ಎತ್ತರ 184 ಅಡಿಗಳವರೆಗೂ ಇರುತ್ತದೆ… ಚಿಮ್ಮುವಿಕೆ ಗೈಜ಼ರಿನಲ್ಲಿ ತುಂಬಿಕೊಳ್ಳುವ ಬಿಸಿನೀರು, ಮತ್ತದರಡಿಯಲ್ಲಿ ಉಂಟಾಗುವ ನೀರ್ಗುಳ್ಳೆಗಳಲ್ಲಿನ ನೀರಾವಿಯ ಒತ್ತಡವನ್ನವಲಂಭಿಸಿರುತ್ತದೆ. ಅದು ನಿರ್ಧಿಷ್ಟಾವದಿ ಆವರ್ತದಲ್ಲಿ ತಪ್ಪದೆ ಉಗಿದು-ಚಿಮ್ಮುವಿಕೆಯ ನಂಬಿಕೆ ಕಾರಣದಿಂದ ಅದಕ್ಕೆ "ಓಲ್ಡ್ ಫ಼ೇತ್ಫು಼ಲ್ ಗೈಜ಼ರ್," ಎಂಬ ಹೆಸರು ಬಂದಿದೆ. ನಾವು, ಪ್ರವಾಸಿಗರು ವೀಕ್ಷಿಸಲು ಅದರ್ಹತ್ತಿರ ಹಾಕಿರುವ ಮರದಟ್ಟಣಿಗೆಯ ಬಳಿಗೆ ಹೋಗುವ ವೇಳೆಗೆ ಚಿಮ್ಮುವಿಕೆ ಪೂರ್ಣವಾಗಿ ನಿಂತುಹೋಗಿತ್ತು. ಮತ್ತದರ ಸಿಡಿದುಗಿತವನ್ನು ನೋಡಲು ಒಂದು ಗಂಟೆ ಕಾಯಬೇಕಾಗಿದ್ದಿತು. ಹಾಗಾಗಿ ಅಲ್ಲಿ ಕಾಯದೆ ನೇರವಾಗಿ ಊಟಕ್ಕಾಗಿ "ಓಲ್ಡ್ ಫೇ಼ತ್ಫು಼ಲ್ ಇನ್" ಒಳಗೆ ಹೋದೆವು. ಓಲ್ಡ್ ಫ಼ೇತ್ಫು಼ಲ್ ಗೈಜ಼ರ್ನ ಉಗಿತದ ಜಿಗಿತವನ್ನು ನೋಡಲು ನಮ್ಮ ಊಟವಾದ ಮೇಲೆ ಅಲ್ಲಿಗೆ ಹಿಂದಿರುಗಿದ್ದೆವು
ಓಲ್ಡ್ ಫ಼ೇತ್ಫು಼ಲ್ ಇನ್:![](https://blogger.googleusercontent.com/img/b/R29vZ2xl/AVvXsEjh-JjLIyFzZFAoSwUKHeNNQWPHLSHfpaDXTQ_dVELZFbMet8GhjS_zey1xnspGM9NIlEIy7NeWkQgbI5oKDdTFmB7KC5gJm6YYYJjsW4vTGXmJEF0xwXcaZSjCX7fsp_DurJku2KLPIOxkA_tGDrCfi1j84qqABK1gqAwTGefcC7t2zjtwp18e6qrltg/s320/IMG-20181018-WA0103.jpg) |
'ಓಲ್ಡ್ ಫ಼ೇತ್ಫು಼ಲ್ ಇನ್' ಪ್ರವೇಶದ್ವಾರದಲ್ಲಿ |
ಅಮೆರಿಕದಲ್ಲಿ ಬಹುತೇಕ ಇರುವ ಕಾಡುಗಳು, ಕೋನಿಫ಼ರಸ್(coniferous) ಕಾಡುಗಳು. ನಮ್ಮ ಹಿಮಾಲಯದಲ್ಲಿ ಅತಿಎತ್ತರದಲ್ಲಿರುವ ಕಾಡುಗಳ ರೀತ್ಯ. ಕಾಡುಗಳು ಯಥೇಚ್ಛವಾಗಿರುವುದರಿಂದ ಮರಕ್ಕೇನು ಕೊರತೆಯಿಲ್ಲ. ಆದ್ದರಿಂದ ಅಮೆರಿಕದಲ್ಲಿ ಮನೆಯ ಗೋಡೆ, ಚಾವಣಿ ಎಲ್ಲಾ ಮರದಿಂದಲೇ ನಿರ್ಮಿತವಾಗಿರುತ್ತವೆ. ಈ ‘ಓಲ್ಡ್ ಫ಼ೇತ್ಫು಼ಲ್ ಇನ್’ ಅನ್ನು ಪೂರ್ಣವಾಗಿ ಹಾಗ್ಹಾಗೆ ಮರಗಳ ಬೊಡ್ಡೆಗಳನ್ನು ಕತ್ತರಿಸಿ ಅಳತೆಗೆ ತಕ್ಕುದಾಗಿ ಕೊಯ್ದು ನಟ್ಟು ಬೋಲ್ಟ್ ಹಾಕಿ ಬಿಗಿದು ನಿರ್ಮಿಸಲಾಗಿದೆ. ಇದರ ಒಳನೋಟದ ಪ್ರವಾಸವನ್ನೇ ಏರ್ಪಡಿಸುತ್ತಾರೆ…ಅದರ ಮಾಲೀಕರು, ನಿರ್ವಹಣಾ ಅಧಿಕಾರಿಗಳು. ಅದಕ್ಕಾಗಿಯೇ ಗೈಡೊಬ್ಬನನ್ನು ನೇಮಿಸಿದ್ದಾರೆ. ಸರಿ ನಾವುಗಳು ಟೊಯ್ಲೆಟ್ ಕರ್ತವ್ಯ ಮುಗಿಸಿ ನೇರವಾಗಿ ಕ್ಯಾಂಟೀನ್ಗೆ ಹೋಗಿ ನಮಗೆ ಬೇಕಾದ ಆಹಾರಕ್ಕೆ ಬೇಡಿಕೆಯಿಟ್ಟು ಹತ್ತು ನಿಮಿಷ ಕಾದು, ಪಡೆದು ಟೇಬಲ್ಲುಗಳಿಗೆ ತೆಗೆದುಕೊಂಡು ಹೋಗಿ ತಿಂದು ಮುಗಿಸಿದ ಮೇಲೆ ಹೊಟೇಲ್ನಲ್ಲಿ ಸುತ್ತಾಡಿದೆವು.
![](https://blogger.googleusercontent.com/img/b/R29vZ2xl/AVvXsEieEG2oXey0Nec0GbpogWV0f2nnpoddd-ZY_qu23YRFbNVYqAOERVXHGQsZxbzDM6Ej3erzAgs2iot7RPG94wUV6LJAEeGiZkse4uzbeVF9rBvCcGc2T49orqea0rYGC2KayH-oTeAp4Z3ozFhsA4rXv7n0ADvpxa_Y0hJ_Zho-eSXN_Qph8BYv761fpw/s320/oldfaithful-insideview.jpg) |
'ಓಲ್ಡ್ ಫ಼ೇತ್ಫು಼ಲ್ ಇನ್' ನ ಒಳನೋಟ |
ಹೊಟೆಲಿನಲ್ಲೊಂದು ಕಡೆ ಗೋಡೆಗಡಿಯಾರವನ್ನು ನೇತುಹಾಕಿದ್ದರು. ಇದರ ಮೇಲೆ ಓಲ್ಡ್ ಫ಼ೇತ್ಫು಼ಲ್ ಗೈಜ಼ರ್ ಸಿಡಿದುಗಿಯಲು ಪ್ರಾರಂಬಿಸುವ ಮುಂದಿನ ವೇಳಾಪಟ್ಟಿಯನ್ನು ಹಾಕಿದ್ದರು. ಅದನ್ನು ನೋಡಿಕೊಂಡು ನಾವು ಮುಂಜಾಗ್ರತೆಯಾಗಿ ಗೈಜ಼ರಿನ ಹತ್ತಿರ ಹೋಗಿ ಮುಂಭಾಗದ ಮರದಟ್ಟಣಿಗೆಯ ಮೇಲೆ ಜಾಗ ಹಿಡಿದು ಕುಳಿತುಕೊಂಡೆವು. ಹತ್ತು ನಿಮಿಷಗಳು ಕಳೆಯುವಷ್ಟರಲ್ಲಿ ಪ್ರವಾಸಿಗರು ಅಲ್ಲಿಗೆ ಲಗ್ಗೆಯಿಟ್ಟಿದ್ದರು. ಓಲ್ಡ್ ಫ಼ೇತ್ಫು಼ಲ್ ಗೈಜ಼ರ್ ಸಿಡಿದುಗಿತದ ಪೂರ್ಣ ವೀಕ್ಷಣೆ ನಂತರ ಅಲ್ಲಿ ಪಕ್ಕದಲ್ಲಿಯೇ ಹರಿಯುತ್ತಿದ್ದ "ಫ಼ೈರ್ಹೋಲ್" ನದಿ ದಂಡೆಯಲ್ಲಿರುವ "ಈಸ್ಟ್ ಚೈನಮನ್ ಸ್ಪ್ರಿಂಗ್, ಬ್ಲೂಸ್ಟಾರ್ ಸ್ಪ್ರಿಂಗ್"ಗಳನ್ನು ನೋಡಿಕೊಂಡು ನದಿಯಾಚೆ ದಡದಲ್ಲಿರುವ ಇನ್ನಿತರ ಬುಗ್ಗೆಗಳನ್ನು ಮತ್ತು ಇತರೆ ಗೈಜ಼ರುಗಳನ್ನು ಮರದಟ್ಟಣಿಗೆಯ ಕಾಲುದಾರಿಯಲ್ಲಿ ನಡೆದುಹೋಗಿ ನೋಡಿಕೊಂಡು ಬರಲಾಯಿತು. ಅದ್ಭುತ ಪ್ರದೇಶವೆನಿಸಿತು.
ಅಟ್ಟಣಿಗೆಯ ದಾರಿಯುದ್ದಕ್ಕೂ ಹಾಕಿದ್ದ ಫಲಕಗಳಲ್ಲಿ "ಏನು?” ಮಾಡಬಾರದು ಎಂಬುದರ ಬಗ್ಗೆ ಎಚ್ಚರಿಕೆ ಸೂಚನೆಗಳನ್ನು ನೀಡಲಾಗಿತ್ತು, ಸೂಚನೆಗಳನ್ನು ಮೀರಿದರೆ ಕಾನೂನಿನ ಪ್ರಕಾರ ಶಿಕ್ಷಾರ್ಹ ಅಪರಾಧ ಆಗುವುದಲ್ಲದೆ ಜೀವಾಪಾಯವೂ ಅಗುತ್ತದೆಂದು ತಿಳಿಹೇಳಿಕೆಗಳಿದ್ದವು.
![](https://blogger.googleusercontent.com/img/b/R29vZ2xl/AVvXsEiLFotQq8lgPLX04SMU9OYEVcD09gvN4mCKtQPLKfIJwnvbbNzYzwxdjhb69dBSHHVAbTVKzAUxw0rTLpXnnD3TIzkOqAix5vDvaBawDh2a66ltK5puwhzwFdszpNlq__FpB5scVKb7pxmns5fAh180SHXQRPULiA5AZLCoD6qkTqa8rK6tN2YmaZbKmA/s320/DSC_0654.JPG) |
'ಓಲ್ಡ್ ಫ಼ೇತ್ಫು಼ಲ್ ಇನ್' ನ ಇನ್ನೊಂದು ಒಳನೋಟ |
![](https://blogger.googleusercontent.com/img/b/R29vZ2xl/AVvXsEhSnO5xeOHayYLU2fCh79vsgMC89g-0PE-MpPM-yUlyygOAUC7sJxWbqekLeHd2oce-zp2mDJz1_dc4xpGBsPzGjC-q_cZzC6yfi0PFpro6d_71ZhNnKGT1f0laO9JoeaevJKFVs8zqiillt8LdvTMuvq6AzMXLDj7_Z8crA_X6v3whfXBwBy9A_921Vg/s320/DSC_0310.JPG) |
ಈಸ್ಟ್ ಚೈನಮನ್ ಸ್ಪ್ರಿಂಗ್ |
ಈ ಪ್ರದೇಶದಲ್ಲಿಯೇ ಅನೇಕ ಜೀವಂತ ಬುಗ್ಗೆಗಳಿದ್ದವು. ಓಲ್ಡ್ ಫೇ಼ತ್ಫು಼ಲ್ ಗೈಜ಼ರ್ ಕಡೆಯಿಂದ ಕಾಲ್ನಡಿಗೆ ದಾರಿಯಿದೆ. ಇದು ಫ಼ೈರ್ಹೋಲ್ ನದಿಯ ಆಸುಪಾಸಿನಲ್ಲಿ ಪಶ್ಚಿಮದ ಕಡೆಗೆ ಹೋಗುವ ಹೈವೇ 89/191ಕ್ಕೆ Artemisia Trail Head ಬಳಿ ಸೇರಿಕೊಳ್ಳುತ್ತದೆ. ನದಿಯ ಅಂಚುಗಳಲ್ಲಿಯೇ ಸುಮಾರು ಭಿನ್ನ ಹೆಸರುಗಳಿಂದ ಕೂಡಿದ ಬುಗ್ಗೆಗಳು, ಜ್ವಾಲಾಮುಖಿಯ ಅನಿಲ ಹೊರ ಹಾಕುವ ರಂದ್ರಗಳು, ಹೊಂಡಗಳು ಇವೆ. ಇವುಗಳನ್ನು ನೋಡಲು ನಡೆದು ಹೋಗಬೇಕು… Grand Geyser,
![](https://blogger.googleusercontent.com/img/b/R29vZ2xl/AVvXsEhVerI7h3F8GUJ-0zaez8ouYC5dq-EyRpp7q_IRfIU0--FLISfVTLKSCHyzVpCZ313KljKY7apkiRzlXXX_aGCTTFvclgUoIfoD_f7H3yv61kugauOygWEORObF6l_fuv9IEYUGGtN6Clsu3BbTn_4r2yN7QDGICBZjkNcp-oq9-5tQOgZqrwgavByAVw/s320/DSC_0316.JPG) |
ಬ್ಲೂಸ್ಟಾರ್ ಸ್ಪ್ರಿಂಗ್ |
Chromatic Pool, Bijou Geyser, Grotto Geyser, Bottomless Pit, Morning Glory Pool, Atomizer Geyser, Seismic Geyser, Biscuit Basin Geyserಗಳಿವೆ. ನಾವು ಮುಂದಕ್ಕೆ ನಡಿಗೆ ಹೋಗಲಿಲ್ಲ. ಸಮಯ ಸಾಯಂಕಾಲ 5.00ಗಂಟೆಯಾಗಿತ್ತು. ಕಾರನ್ನು "ಎಕ್ಸಲ್ಸರ್" ಮತ್ತು "ಗ್ರ್ಯಾಂಡ್ ಪ್ರಿಜ಼್ಮ್ಯಾಟಿಕ್ ಸ್ಪ್ರಿಂಗ್" ಕಡೆಗೆ ತಿರುಗಿಸಿ ಹೊರಟೆವು.
ಬಿಸಿನೀರ ಬುಗ್ಗೆಗಳು/Hot Springs:
ಉದ್ಯಾನದಲ್ಲಿರುವ ಸಾಮಾನ್ಯ ಹೈಡ್ರೊತರ್ಮಲ್ ವೈಶಿಷ್ಟ್ಯಗಳಿವು, ಕೆಲವು ಪಾತ್ರೆಯಲ್ಲಿ ಕುದಿಯುತ್ತಿರುವ ನೀರಿನಂತಿದ್ದರೆ ಮತ್ತೆ ಕೆಲವು ಹಬೆಯಿಂದ ಕೂಡಿದ ಸೌಮ್ಯ ತಿಳಿಯಾದ ಬಿಸಿನೀರಿನ ಆಳವಾದ, ಅಗಲವಾದ ಹೊಂಡಗಳು, ಸಾಮಾನ್ಯವಾಗಿ ಅತಿಯುಷ್ಣತೆಯ ನೀರಿನಲ್ಲಿ ಕ್ರಿಯಾಶೀಲವಾಗಿರುವ ಅಣುಜೀವಿಗಳು(Thermophiles) ಮತ್ತು ನೀರಿನಲ್ಲಿರುವ ಲವಣಾಂಶಗಳ ಜೊತೆ ನಡೆಯುವ ಪ್ರಕ್ರಿಯೆಯಿಂದಾಗಿ ಆ ಬುಗ್ಗೆಯ ಹೊಂಡಗಳಿಗೆ ಗಾಢವಾದ ಕೆಂಪು, ನಸುಗೆಂಪು, ಕಿತ್ತಳೆ, ನೀಲಿ ಬಣ್ಣಗಳನ್ನು ಕೊಟ್ಟಿರುತ್ತವೆ. ನಾವು ನೋಡಿದ ಹಲವು, ಮೇಲ್ದಂಡೆ ಕಟ್ಟೆಯಲ್ಲಿ ಎಡಕ್ಕಿರುವ ಗ್ರ್ಯಾಂಡ್ ಲೂಪ್ ರಸ್ತೆಯಲ್ಲಿ "ಮಿಡ್ವೇ ಗೈಜ಼ರ್ ಬೇಸಿನ್"ನಲ್ಲಿ ಫ಼ೈರ್ಹೋಲ್ ನದಿಗೆ ಆತುಕೊಂಡಿವೆ ಈ ಬುಗ್ಗೆಗಳು.
![](https://blogger.googleusercontent.com/img/b/R29vZ2xl/AVvXsEhL-6BlYBDVlK5iR8i8K5GgX_dWnJdhlOiRE3BNyuD5mMJSnLEhyc4BE6gzXQLb93YhYCzijLDnEOxMzr4JzJuIVVKV2Twf_Cgc7HLDqZ1GFdydZTu9YABRT0YttqruBAOLmTNNJs4QHa2n9GhOUX1VdKPC4t7cR2u44y_2VaaIam8GAzyRmrhB3X1pDQ/w320-h228/Hot-water_from_Excelsior_Geyser_to_Firehole_River.jpg) |
ಎಕ್ಸಲ್ಸರ್ ಗೈಜ಼ರ್ ಹೊರಹಾಕುವ ಬಿಸಿನೀರು ಫ಼ೈರ್ಹೋಲ್ ನದಿಗೆ |
ಎಕ್ಸಲ್ಸರ್ ಮತ್ತು ಗ್ರ್ಯಾಂಡ್ ಪ್ರಿಜ಼್ಮ್ಯಾಟಿಕ್ ಬುಗ್ಗೆಗಳು:
![](https://blogger.googleusercontent.com/img/b/R29vZ2xl/AVvXsEiDht3pXNu6hWF9OIkEEZP0WpZnITPJnExY-AOUJ5g5BE3GiJPyHgSWbtHK-nzfwRjwMi15w6QgCXM3AjCVWjgUzqUSVz4J2Q1nP6W5wXmkuoEIkZl0W6E5Fw4oxDuZ-9CvJUSeLxHUuME10owyhtO6iPRPOHiEh8H0Mu1QFla1zqMHjBxLfFft5w2_DQ/s320/DSC_0353.JPG) |
ಎಕ್ಸಲ್ಸರ್ ಗೈಜ಼ರ್ |
ಎಕ್ಸಲ್ಸರ್, ಒಂದು ಅತಿದೊಡ್ಡ ಗೈಜ಼ರ್ ಎಂದು ಗುರುತಿಸಲಾಗಿದೆ. ಇಸವಿ 1880ರಲ್ಲಿ ಸಿಡಿದು 50 ರಿಂದ 300 ಅಡಿಗಳೆತ್ತರಕ್ಕೆ ಚಿಮ್ಮಿದ್ದಿತೆಂದು ದಾಖಲಾಗಿದೆ. ಈ ಭಯಂಕರ ತಾಪದ ಬುಗುಲು ಸಿಡಿತದಿಂದಾಗಿ ಕ್ರೇಟರ್ನೊಳಗಿನ ಗೈಜ಼ರ್ನ ಭೂಗರ್ಭದೊಳಗಿನ ವ್ಯವಸ್ಥೆಯನ್ನು ನಾಶಪಡಿಸಿದ ಅದು, ಆ ಮೂಲಕ 1890ರ ವೇಳೆಗೆ ತನ್ನ ತಾಮಸವನ್ನು ಕಡಿಮೆ ಮಾಡಿ ಸಿಡಿತದ ಚಿಮ್ಮುವಿಕೆಯನ್ನು ತಣ್ಣಗಾಗಿಸಿತೆಂದು ಅಲ್ಲಿನ ಮಾಹಿತಿ ತಿಳಿಸುತ್ತದೆ. ಹತ್ತು ವರ್ಷಗಳ ಕಾಲ ಸತತವಾಗಿ ಸಿಡಿಯುತ್ತಿತ್ತೆಂದು ಮಾಹಿತಿ. ಪುನಃ ಅದು ಸೆಪ್ಟಂಬರ್ 14, 1985ರಂದು ದೊಡ್ಡದಾಗಿ ಸಿಡಿದು 47ಗಂಟೆಗಳ ಕಾಲ ಬುಗಿಲು ಬಿದ್ದಂತೆ 20ರಿಂದ 80ಅಡಿಗಳೆತ್ತರಕ್ಕೆ ಚಿಮ್ಮುತ್ತಲೇ ಇತ್ತೆಂಬುದು ಅದರ ಮಾಹಿತಿ. ಇದೀಗ ಈ ಬಿಸಿನೀರ ಬುಗ್ಗೆ ತಾಮಸವಾಗಿ ತಟಸ್ಥವಾಗಿದೆ. ಈ ಗೈಜ಼ರ್ ನಿಮಿಷವೊಂದಕ್ಕೆ 4050 ಗ್ಯಾಲನ್ಗಳಷ್ಟು ಬಿಸಿನೀರನ್ನು ಹೊರಹಾಕಿ ಫ಼ೈರ್ಹೋಲ್ ನದಿಗೆ ಹರಿಸುತ್ತದೆ. ಆದರೆ ಅದು ಮತ್ತೆ ಯಾವಾಗ ಸಿಡಿಯುತ್ತದೆಂದು ನಿರ್ಧಿಷ್ಟವಾಗಿ ಹೇಳಲಿಕ್ಕಾಗುವುದಿಲ್ಲೆವೆಂದು ವಿಜ್ಞಾನಿಗಳ ಅಭಿಪ್ರಾಯ. ಎಕ್ಸಲ್ಸರ್ ಗೈಜ಼ರ್ನ ಒರಟಾದ ಅಪರೂಪದ ಜ್ವಾಲಾಮುಖಿ ಗುಳಿ, ಭಾರಿ ಗೈಜ಼ರ್ ಸಿಡಿತದಿಂದ ಸೃಷ್ಟಿಯಾಗಿದೆ. ಅಚ್ಚರಿಯೆಂದರೆ, ಇದು ಬಹು ಅಪರೂಪದ ತನ್ನ ಗತಕಾಲದ ಚರಿತ್ರೆಯನ್ನೇ ಹೊಂದಿದೆ. ಸಾವಿರಾರು ವರ್ಷಗಳಿಂದ ಪಕ್ಕದಲ್ಲಿನ "ಗ್ರ್ಯಾಂಡ್ ಪ್ರಿಜ಼್ಮ್ಯಾಟಿಕ್ ಬುಗ್ಗೆ"ಯಿಂದ ಹರಿದು ಬರುವ ಬಿಸಿನೀರಿನೊಳಗೆ ಬಹುಸಂಖ್ಯಾಕವಾಗಿ ಬೆಳೆದ ಕ್ರಿಯಾಶೀಲ ಸೂಕ್ಷ್ಮ ಜೀವಾಣುಗಳು ಜೀವಂತವಾಗಿ ಹೂತುಹೋಗುವುದರಿಂದ ಗೈಜ಼ರುಗಳ ಸುತ್ತಲೂ ಪದರುಪದರಾದ ಸಿಲಿಕಾ-ಖನಿಜ ಸಾಂದ್ರೀಕೃತ-ಅಕ್ಕಳಿಕೆಗಳನ್ನು ಸೃಷ್ಟಿಸಿವೆ.
"ಗ್ರ್ಯಾಂಡ್ ಪ್ರಿಜ಼್ಮ್ಯಾಟಿಕ್ ಬುಗ್ಗೆ" ಅದರ ಬಣ್ಣದಿಂದಾಗಿ ಪ್ರವಾಸಿಗರ ಆಕರ್ಷಣೆಗೆ ಕಾರಣವಾಗಿದೆ. ಸುತ್ತಳತೆ 370 ಅಡಿಗಳಷ್ಟಿರುವ ಇದು 160 ಅಡಿ ಆಳವಿದೆಯೆಂದು ಅಂದಾಜಿಸಿದೆ. ಅಮೆರಿಕದಲ್ಲಿಯೇ ದೊಡ್ಡದಾದ ಬಿಸಿನೀರ ಬುಗ್ಗೆಯಾಗಿರುವ ಇದು ನ್ಯೂಜಿ಼ಲೆಂಡಿನಲ್ಲಿರುವ "ಫ಼್ರೈಯಿಂಗ್ ಪಾನ್ ಲೇಕ್" ಮತ್ತು ಡೊಮಿನಿಕಾ ದೇಶಲ್ಲಿರುವ "ಬಾಯ್ಲಿಂಗ್ ಲೇಕ್" ಗಳ ನಂತರದ ಮೂರನೇ ಸ್ಥಾನದಲ್ಲಿದೆ. ಬುಗ್ಗೆಯು ನಿಮಿಷಕ್ಕೆ 560 ಗ್ಯಾಲನ್ ಬಿಸಿನೀರು ಹೊರಹಾಕುತ್ತದೆ. ಖನಿಜಯುಕ್ತ ನೀರು, ಬಣ್ಣಯುಕ್ತ ಸೂಕ್ಷ್ಮ ಜೀವಾಣುಗಳು ಮತ್ತು ಉಷ್ಣತೆಯ ಸಂಯೋಗದಿಂದಾಗಿದೆ… ಬಣ್ಣಗಳು, ಸಾಮಾನ್ಯವಾಗಿ ಬುಗ್ಗೆಯಲ್ಲಿನ ನೀರು, ಉಷ್ಣಾಂಶ, ಜೀವಾಣುಗಳಲ್ಲಿನ chlorophyll to carotenoids(ಕಲರಿಂಗ್ ಪಿಗ್ಮೆಂಟ್ಸ್)ಗಳ ಪ್ರಮಾಣಗಳ ಮೇಲೆ ಅವಲಂಭಿತವಾಗಿ ನಿರ್ಧರಿತವಾಗಿರುತ್ತವೆ.
![](https://blogger.googleusercontent.com/img/b/R29vZ2xl/AVvXsEhBhXkX-7UanHNXhqoZM5SHg_J0kE-lCiJMa3C_cqOnoP77VxMseONnF3cfxq4RKGXpGXKIVBreYSTdl4uY3FhSflsRCETWlTlIHi-5PhyZudU_6yOX_A3kas_k2lnQ_S30SJ1Ym2L8nEYbo0m6NvqOIJ1L8m44OnSDO8x8QFrUishW20m8wba_kdElVA/s320/DSC_0648.jpg) |
ಗ್ರ್ಯಾಂಡ್ ಪ್ರಿಜ಼್ಮ್ಯಾಟಿಕ್ ಬುಗ್ಗೆ |
ಬುಗ್ಗೆಯ ಕೇಂದ್ರದಲ್ಲಿ ಉಷ್ಣಾಂಶ ಅತಿಯಾಗಿರುವ ಕಾರಣ ಅಲ್ಲಿ ಜೀವಾಣುಗಳು ಬದುಕುವುದು ಸಂದೇಹಾಸ್ಪದ, ಉಷ್ಣಾಂಶವು ಕೇಂದ್ರ ಸ್ಥಳದಿಂದ ಅಂಚಿನ ಕಡೆಗೆ ಹೋಗುತ್ತಾ ಕಡಿಮೆಯಾಗುತ್ತದೆ… ಕಾರಣ ಪ್ರಖರ ಪ್ರಜ್ವಲ ಹಳದಿ, ಕಡು-ಕಿತ್ತಲೆ ಮತ್ತು ಗಾಢ ಕೆಂಪು ಬಣ್ಣಗಳು ಸುತ್ತಲಂಚಿನಲ್ಲಿ ಕಾಣಸಿಗುತ್ತವೆ… ಉಳಿದಂತೆ ಮಧ್ಯದಲ್ಲಿ ಗಾಢ ನೀಲಿ ಬಣ್ಣದಿಂದ ಕೂಡಿದೆ. ಅದರ ಆ ಬಣ್ಣಗಳು ಪ್ರಿಜ಼ಮ್ ಮೂಲಕ ಹೊರಟ ಬೆಳಕು ವಿಭಿನ್ನ ಬಣ್ಣಗಳಾಗಿ ಕಾಮನಬಿಲ್ಲಿನ ರೀತ್ಯ ಹೊರಹೊಮ್ಮುವುದರಿಂದ ಆ ಬುಗ್ಗೆಗೆ "ಗ್ರ್ಯಾಂಡ್ ಪ್ರಿಜ಼್ಮ್ಯಾಟಿಕ್" ಹೆಸರು ಅಂಟಿಕೊಂಡಿದೆ. ಇಸವಿ 1871ರಲ್ಲಿ ಜಿಯಾಲಜಿಸ್ಟ್ಗಳು ಹೇಡನ್(ಉದ್ಯಾನದ ಒಂದು ಪ್ರದೇಶ)ನಲ್ಲಿ ಸರ್ವೆ ನಡೆಸುತ್ತಿದ್ದಾಗ ಇದು ಗಮನಕ್ಕೆ ಬಂದುದರಿಂದ ಆ ಹೆಸರನ್ನು ಬುಗ್ಗೆಗಿಡಲಾಗಿದೆ. ಪ್ರವಾಸಿಗರಿಂದ ಅತೀವವಾಗಿ ಛಾಯಾಚಿತ್ರಿತಗೊಂಡಿರುವ ಬುಗ್ಗೆಯೆಂದು ದಾಖಲಾಗಿದೆ.
ಆರ್ಟಿಸ್ಟ್ಸ್' ಪೇಂಟ್ ಪಾಟ್ಸ್:ಗಿಬ್ಬನ್ ಗೈಜ಼ರ್ ಬೇಸಿನ್, ನೋರಿಸ್ ಗೈಜ಼ರ್ ಬೇಸಿನ್ನ ದಕ್ಷಿಣಕ್ಕೆ ಮೂರು ಮೈಲಿಗಳ ದೂರದಲ್ಲಿದೆ. ಗಿಬ್ಬನ್ ಗೈಜ಼ರ್ ಬೇಸಿನ್ನಲ್ಲಿ ಅಲ್ಲಲ್ಲಿ ವಿಭಿನ್ನ ರೀತಿಯ ಹಲವು ಗುಂಪುಗಳ ತರ್ಮಲ್ ಮೇಲ್ಮೈ ಲಕ್ಷಣಗಳನ್ನು ಕಾಣಬಹುದು. ತುಂಬಾ ಪ್ರಸಿದ್ಧವಾದವುಗಳೆಂದರೆ “ಆರ್ಟಿಸ್ಟ್ಸ್' ಪೇಂಟ್ ಪಾಟ್ಸ್,” 50 ಸ್ಪ್ರಿಂಗ್ಗಳ ಗುಂಪು ಇರತ್ತವೆ.
![](https://blogger.googleusercontent.com/img/b/R29vZ2xl/AVvXsEiQPoDcTZ8FMXAvFLq3bFJwcfrrpIzb624UrsXISNZU_7DAPzIDTwCCi7CtJyzGQRkwiyY7kJmybLBtgr1GNzNtUIecnz_JEM46iXzmlG-xdc1WTflkx0txNVLgr4Y85990bu0BlkPSSWJThJg7sGwavCpDHSgVlrbRcDXj1e5FOIMC_UPPs1rat0O0IA/s320/paint-pot-1.jpg) |
ಭಿನ್ನ ಪೇಂಟ್ ಪಾಯಿಂಟ್ಗಳು |
![](https://blogger.googleusercontent.com/img/b/R29vZ2xl/AVvXsEj8UK5dJidUPfxwLpB0BDSXunqdTfJzmgH6BK0AV3m85Qj-50xpPPyUx4vWE13JL0iFcTNPMLES3erdksAtFYy5QTR3y6ePcdbWIs99O2MxKSY6pu44E_xYo-ShnM-d6E6klQjfD8jIHWWFVxNs_o4c3zB9FpeMZ-mvBNZ9PZQLiBM65r4iz8PzjUjHvA/s320/artists-paint-pot-2.jpg)
![](https://blogger.googleusercontent.com/img/b/R29vZ2xl/AVvXsEgBWjbDJqJuvIiFQdKgh6bAiTAQv4q1SNdh1CLX8gd5EBH6N0aSqcfvA8v6OCdc_Kb1XY1rEm4XZ9Jq6r9Z2xzoVL58n9DynnQUAnsPWleRaCrhIVK-oUrEEB2BEKnN8ODbbPrLTKirCIFwTSzV14xjJud8ceAkcOOIVN4mECQB99KwtgQqbkMVXOCsqw/s320/paint-pots4.jpg)
ಗೈಜ಼ರುಗಳು, ಅನಿಲ ಸೂಸುವ ಬಾಯಿಗಳು(ರಂದ್ರಗಳು), ಮತ್ತು ಮುಖ್ಯವಾಗಿ ಕೆಸರು ಕುಂಡಗಳು (ಮಡ್ ಪಾಟ್ಸ್) ಇವೆ. ಇವುಗಳು ನೀಲಿ, ಮಸುಕು, ಮತ್ತು ನಸುಗೆಂಪು ಬಣ್ಣಗಳಿಂದ ಕೂಡಿದ್ದು ವಿಭಿನ್ನ ರಚನೆಗಳನ್ನು ಹೊಂದಿರುತ್ತವೆ, ಅವುಗಳ ನಡವಳಿಯು ನೆಲದಡಿಯಲ್ಲಿ ದೊರೆಯುವ ನೀರಿನ ಪ್ರಮಾಣವನ್ನವಲಂಬಿಸಿ ವರ್ಷಾವದಿಯಲ್ಲಿ ಬದಲಾಗುತ್ತಿರುತ್ತದೆ…. ಇವುಗಳನ್ನು ನೋಡಲು ಮುಖ್ಯರಸ್ತೆಯಿಂದ ಸಣ್ಣ ಪಕ್ಕದ ರಸ್ತೆಯಲ್ಲಿ ಹೋದರೆ ನೇರ ವಾಹನ ನಿಲ್ದಾಣಕ್ಕೆ ತಲುಪುತ್ತದೆ. ಅಲ್ಲಿಂದ ಮುಂದಕ್ಕೆ ಹೋಗಲು ಕಾಲುದಾರಿ ಹಿಡಿದು ಪೇಂಟ್-ಪಾಟ್ಸ್ ಗುಡ್ಡ ತಲುಪಿದರೆ ಮರದಟ್ಟಣಿಗೆ ಕೊಂಡಿ(ಲೂಪ್) ದಾರಿಯಲ್ಲಿ ಹತ್ತುತ್ತಾ ಅರ್ಧಮೈಲಿ ಸುತ್ತಿಳಿದು ಬಂದರೆ ಎಲ್ಲಾ ಕೆಸರು ಕುಂಡಗಳನ್ನು ನೋಡಬಹುದು.
ಕೊಂಡಿ ದಾರಿಯಲ್ಲಿ ಉತ್ತರದ ಕಡೆಯಿಂದ ಹತ್ತುತ್ತಾ ಹೋದಂತೆ ಮೊದಲಿಗೆ ಸುಮಾರಾಗಿ ಕುದಿಯುವ ಹಂತದಲ್ಲಿನ ನೀಲಿಮಿಶ್ರಿತ ಹಾಲು ಬಣ್ಣದ, ಅಂಚಿನಲ್ಲಿ ಕೆಂಪಾದ ಗಂಧಕದ ಲೇಪಗಳು ಕೂತಿರುವ ಕುಂಡಗಳು. ಮುಂದೆ ಹಲವಾರು ಸಣ್ಣ ಹೊರಬಾಯಿಗಳು(vents), ಪೈನ್ ಮರಗಳ ಮಧ್ಯೆ ಪೂರ್ವಕ್ಕೆ ತಿರುಗಿ ಹೋದಂತೆ ಅಸಾಧಾರಣ ದೊಡ್ಡ ಕೆನೆಬಣ್ಣದ ಕೆಸರು ಕುಂಡಗಳು, ತೆಳುವಿನಿಂದ ಹಿಡಿದು ಅತಿಮಂಧದವರೆಗಿನ ಕೊತಕೊತನೆ ಕುದಿಯುವ ಕುಂಡಗಳನ್ನು ಕಾಣಬಹುದು. ಇವುಗಳು ಕಲಾವಿದರು ಅವರ ಬಣ್ಣದ ತಟ್ಟೆಯ ಮೇಲೆ ಮಿಶ್ರಣಮಾಡಿಕೊಳ್ಳುವ ಬಣ್ಣಗಳ ರೀತ್ಯ ಕಾಣಿಸುತ್ತವೆ. ಹಾಗಾಗಿ ಆ ಹೆಸರು ಈ ಕುಂಡಗಳಿಗೆ ಬಂದಿದೆ.
![](https://blogger.googleusercontent.com/img/b/R29vZ2xl/AVvXsEi1r8TMnWKUNAe2ZC-qbGf-9NAouV0lei90tZUnX61-tT65KZ_bh_o9rWHfKfoPib5VGM43WSOeD85XbM0qHrU1tAyZe9edIKLIPV2940UpOjACPHucTPsDZd571xiIpbCUDfPYzbQcdl-GnJHYhBILLzD8QGx5Qot-2HDKJV26RoZu7O491uqCz9r3Tg/s320/paint-pots3.jpg) |
ಪೇಂಟ್ ಪಾಯಿಂಟ್ಗಳ ವಿಹಂಗಮ ನೋಟ |
ಇಲ್ಲಿ ಗಂಧಕದ ವಾಸನೆಯು ವ್ಯಾಪಕವಾಗಿ ಹರಡಿ- ಕೊಂಡಿರುತ್ತದೆ. ಈ ಗುಡ್ಡದ ಮೇಲ್ಹಂತದಲ್ಲಿ ನಾವು ಗಿಬ್ಬನ್-ರಿವರ್ ಕಣಿವೆಯ ವಿಹಂಗಮ ದೃಶ್ಯವನ್ನು ಹಲವಾರು ಮೈಲಿಗಳ ದೂರದವರೆಗೂ, ಗಿಬ್ಬನ್ ಹುಲ್ಲುಗಾವಲಿನಿಂದ ಆಚೆವರೆಗೂ ನೋಡಬಹುದು. ನಾವು "ಆರ್ಟಿಸ್ಟ್ಸ್' ಪೇಂಟ್ ಪಾಟ್ಸ್" ನೋಡಿಕೊಂಡು ಕಾರು ನಿಲ್ದಾಣಕ್ಕೆ ಹಿನ್ನಡೆದು ಬರುವ ವೇಳೆಗೆ ಆಗತಾನೆ ಸೂರ್ಯ ಮುಳುಗುತ್ತಲಿದ್ದ, ಸಂಜೆ/ರಾತ್ರಿ 8.00 ಗಂಟೆಯಾಗುತ್ತಲಿತ್ತು. ನಮ್ಮ ಮುಂದಿನ ನಡಿಗೆ ಮೊಂಟಾನ ರಾಜ್ಯದ "ಕೂಕ್ ಸಿಟಿ, Cooke City,” ರಾತ್ರಿ ತಂಗಣೆಯ ಸ್ಥಳ, ಸುಮಾರು ಎರಡು ಗಂಟೆ ಪ್ರಯಾಣದ ದಾರಿ.
ಗೈಜ಼ರ್ ಕ್ರೀಕ್ ಕಡೆಯಿಂದ ಹೊರಟ ನಾವು ಬಲ ಗ್ರ್ಯಾಂಡ್ ಲೂಪ್ ರಸ್ತೆಯ ರೂಸ್ವೆಲ್ಟ್ ಟವರ್ ಜಂಕ್ಷನ್ ಬಳಿ ಕತ್ತಲೆಯಲ್ಲಿ ಕೂಕ್ ಸಿಟಿ ಕಡೆಗೆ ತಿರುವು ಪಡೆದು ಹೋಗುವ ರಸ್ತೆ ಕಾಣಿಸದೆ ನೇರವಾಗಿ ಮುಂದೆ ಹೋಗಿದ್ದೆವು ನಂತರ ಅನುಮಾನ ಬಂದು ಹಿಂದಿರುಗಿ ಬಂದಾಗಲೂ ಹಿಂದಕ್ಕೇ ಬಹುದೂರ ಬಂದು ಬಿಟ್ಟಿದ್ದೆವು. ಈ ಸಮಯದಲ್ಲಿ ನಮಗೆ ಕತ್ತಲೆ ದಾರಿಯಲ್ಲಿ ಅಡ್ಡಲಾಗಿ ಹೋಗುತ್ತಿದ್ದ ಕಯೋಟಿ, ನರಿ ಜಾತಿ ಪ್ರಾಣಿಯೊಂದು ಸಿಕ್ಕಿತ್ತು, ಅದೇ ನಮ್ಮ ಪುಣ್ಯ. ಅಲ್ಲೊಂದು ದಾರಿಬದಿಯ "ಟವರ್ ಜನರಲ್ ಸ್ಟೋರ್ಸ಼್,"ಹೋಟೆಲಂಗಡಿ ಇತ್ತು, ಅಲ್ಲಿ ರಾತ್ರಿಗೆ ತಿನ್ನಲೇನಾದರೂ ಕೊಂಡುಕೊಂಡು ಕೂಕ್ ಸಿಟಿ ಕಡೆಗೆ ಹೋಗುವ ಮಾರ್ಗದ ಮಾಹಿತಿ ಪಡೆದು ಮತ್ತೆ ದಾರಿ ಹುಡುಕುತ್ತಾ… ನಿದಾನವಾಗಿ ಬಲಗಡೆಗೆ ದಾರಿ ತಿರುವ ಹುಡುಕುತ್ತಾ ಹಿಂದಿರುಗಿದೆವು. ಈಬಾರಿ ನಾವು ಗಮನವಿಟ್ಟು ಚಲಿಸುತ್ತಿದ್ದುದರಿಂದ ಬಲಕ್ಕೆ ಟವರ್ ಜಂಕ್ಷನ್ಗೆ ಮೊದಲು ನಾವು ಹೋಗಬೇಕಾಗಿದ್ದ ತಿರುವು ದಾರಿ ಸಿಕ್ಕಿತು. ಕೂಕ್ ಸಿಟಿಯ ನಮ್ಮ ತಂಗಣೆ ಸ್ಥಳ ಆಲ್ಪೈನ್ ಮೊಟೆಲ್ ತಲುಪುವ ವೇಳೆಗೆ ಗಂಟೆ ರಾತ್ರಿ 10.30ರ ಮೇಲಾಗಿದ್ದಿತು. ದಾರಿಯಲ್ಲಿ ಕೊಂಡುತಂದ ತಿಂಡಿ ಮತ್ತು ಗೊಜ್ಜವಲಕ್ಕಿ ರಾತ್ರಿಯ ಊಟ ಮಾಡಿ ಮಲಗಿದೆವು. ಕೂಕ್ ಸಿಟಿ, ಹೆಸರಿಗೆ ಮಾತ್ರ ಸಿಟಿ, ಇದೊಂದು ಪ್ರವಾಸಿಗರ ತಂಗುದಾಣಗಳು ಮತ್ತು ಕೆಲವು ಚಿಕ್ಕಪುಟ್ಟ ತಯಾರಿಕಾ, ರಿಪೇರಿ ಘಟಕಗಳು ಮತ್ತು ಒಂದೆರಡು ಗ್ಯಾಸ್ ಸ್ಟೇಷನ್ನುಗಳಿರುವ ಹಳ್ಳಿ ಪ್ರದೇಶ.
ಆಗಸ್ಟ್ 29, 2018: 105 Main St, Cooke City-Silver Gate, MT 59020, United States
![](https://blogger.googleusercontent.com/img/b/R29vZ2xl/AVvXsEiH8bhgtsMp0Sfo-ZY1U0LvxcXXiveCXFdCDa22t4ZjG5a6fAtvRJ0PW5wsc-Wmj1zuNqvBBDSlAi_nuQG6g6ZngRYdB6aBdszv-jKIYwXQcnvQ_tQ9NQP3CCoROOoTBaVoAzcVnhBCxe8PWjdxITGAUpU0lphuWyIdMauobgvm_T7-_CaZtC_ZxSoQJQ/s320/DSC_0419.JPG) |
ಆಲ್ಪೈನ್ ಮೋಟೆಲಿನ ಒಂದು ನೋಟ |
ಬೆಳಗ್ಗೆ ನಾವುಗಳು ಎದ್ದು ಹೊರಡಲು ಸಿದ್ಧವಾಗಿ ಆಲ್ಪೈನ್ ಮೋಟೆಲಿನ ಪುಕ್ಕಟೆ ಕಾಫಿ಼ ವೆಂಡಿಂಗ್ ಮೆಶೀನ್ ಬಳಿ ಹೋಗಿ ಕಾಫಿ಼ ಬಸಿದುಕೊಂಡು ಕುಡಿದು ಹೊರಡುವ ವೇಳೆಗೆ ಸಮಯ8.51ಗಂಟೆ. ಯೆಲ್ಲೊಸ್ಟೋನ್ ನ ಉಳಿದ ಭಾಗಗಳನ್ನು ನೋಡಲು ಹಿಂದಿರುಗಿದೆವು. ಹಿಂದಿರುಗುವಾಗ ಪುನಃ ಪ್ರವೇಶ ಪಡೆಯಬೇಕಾಗಿತ್ತು. ನಮ್ಮಲ್ಲಿದ್ದ ಪಾಸ್ ದಾಖಲಿಸಿ ಮರುಪ್ರವೇಶ ಪಡೆದೆವು. ದಾರಿಯಲ್ಲಿ ಬಲಗಡೆಗಿದ್ದ ಬೆಟ್ಟದ ಕಡಿದಾದ ದಂಡೆಗಳ ಮೇಲೊಂದು ಕಾಡುಹೋತವೊಂದು ಓಡಾಡುತ್ತಿದ್ದುದನ್ನು ಗಮನಿಸಿದೆವು. ಪಾರ್ಕಿಗೆ ಒಳಗೊಂಡ ಲಾಮಾರ್ ಕಣಿವೆಯಲ್ಲಿ ಒಂದುಕಡೆ ರಸ್ತೆ, ನದಿ ದಂಡೆಯಲ್ಲಿಯೇ ಹೋಗುತ್ತದೆ. ಅಲ್ಲಿ ಸುಮಾರು ಕಾರುಗಳು ನಿಲ್ಲಲ್ಪಟ್ಟಿದ್ದವು.
![](https://blogger.googleusercontent.com/img/b/R29vZ2xl/AVvXsEgHPbXsuhTy6Zgi6TgZ5fKHdZqLTigqOf3rpxCPQtgkxpgw1GWoLD_QHP_sQbwb-vBwgQfT05xvzMYfzCkdRZ1aFqysNLDZ80FEUZUchdCqLxGcPGcP64rlM4EMp5kfQm8IvOJ3MZKkBpeZCe4Fzb2dmM-XUQ4fcGpSenkyBRAbZDip9gp65fyShw1XpA/s320/DSC_0427.JPG) |
ಮೊಂಟಾನದ ಕೂಕ್ ಸಿಟಿ ಕಡೆಯ ಪ್ರವೇಶದ್ವಾರ |
ಪ್ರಯಾಣಿಕರು ಕಾರಿನಿಂದಿಳಿದು ವನ್ಯಪ್ರಾಣಿಗಳನ್ನು ನೋಡುತ್ತಿದ್ದರು. ಅಲ್ಲಿ ಸುತ್ತಲೂ ಕಾಡೆಮ್ಮೆ ಕಾಡುಕೋಣಗಳೇ ಓಡಾಡುತ್ತಿದ್ದವು, ನದಿಯಾಚೆಗಿನ ದಂಡೆಯಲ್ಲಿ ಜಿಂಕೆಗಳ ಗುಂಪೊಂದು ಹೊಗುತ್ತಿದ್ದುದನ್ನು ಪ್ರವಾಸಿಗರು ಗಮನವಿಟ್ಟು ನೋಡುತ್ತಿದ್ದರು. ಏಕೆಂದರೆ ಎರಡು ತೋಳಗಳು ಜಿಂಕೆಗಳ ಹಿಂಡನ್ನು ಹಿಂಬಾಲಿಸುತ್ತಿದ್ದವು. ಪ್ರವಾಸಿಗರು, ಮುಖ್ಯವಾಗಿ ತೋಳಗಳು ಹೇಗೆ ಬೇಟೆಯಾಡುತ್ತವೆಯೆಂದು ನೋಡುವುದಾಗಿತ್ತು?! ನಾವು ಕೂಡ ಕಾರನ್ನು ರಸ್ತೆ ಬದಿಯಲ್ಲಿ ನಿಲ್ಲಿಸಿ ಕೆಳಗಿಳಿದು ಒಂದ್ಹದಿನೈದು ನಿಮಿಷ ಪ್ರವಾಸಿಗರ ಜೊತೆಯಲ್ಲಿ ಕಳೆದು ಮುನ್ನಡೆದೆವು.
![](https://blogger.googleusercontent.com/img/b/R29vZ2xl/AVvXsEi36vLEsyrO8InGrOQkZrlN12pzboe_fZboKNlvsYvW2HzaGUtUkB3e8H5UxqOy4qTWSuTVcT5vgxYdj4TFpZuxSrIq9KOMGOgHwR8Q78AeaNZDaT828R6ND4nzXr8fvsInGYhQcVK_Yft3m2bT7AgtPSdfNAe2Q-7KAKFLTiwO5zaQtPtOkc-sY3U2sg/s320/DSC_0449_2.JPG) |
ಲಾಮಾರ್ ಕಣಿವೆ ರಸ್ತೆಯಲ್ಲಿ |
ನಾವು ಗ್ರ್ಯಾಂಡ್ ಲೂಪ್ ರಸ್ತೆಗೆ ಪ್ರವೇಶಿಸಿದಾಗ ಎದುರುಗಡೆಯೇ ಒಂದು ಗ್ಯಾಸ್ ಸ್ಟೇಷನ್, ಮತ್ತೊಂದು ತಂಗಣಾ ಸ್ಥಳ ರೂಸ್ವೆಲ್ಟ್ ಲಾಡ್ಜ್ ಇದ್ದಿತು. ಅಲ್ಲೇನಾದರೂ ಉಪಾಹಾರ ದೊರಕುತ್ತದೆಯೇ ಎಂದು ವಿಚಾರಿಸಿ, ಅದು ಲಭ್ಯವಿಲ್ಲೆಂದು ಪರಿಗಣಿಸಿದ ಮೇಲೆ ಲೂಪ್ ರಸ್ತೆಯಲ್ಲಿ ಗ್ರ್ಯಾಂಡ್ ಕ್ಯಾನಿಯನ್ ಕಡೆಗೆ ಪಯಣಿಸಿದೆವು. ಹಿಂದಿನ ರಾತ್ರಿ ನಮಗೆ ದೊರಕಿದ್ದ ಟವರ್ ಜನರಲ್ ಸ್ಟೋರ್ಸ಼್ ಸಂಕೀರ್ಣ ಸಿಕ್ಕಿತು. ಅಲ್ಲಿ ನಾವು ಒಳಹೋಗಿ ನಮಗೆ ಬೇಕಾದ ಆಹಾರ ಮತ್ತಿನ್ನಿತರೆ ಪದಾರ್ಥಗಳನ್ನು ಖರೀದಿಸಿ ಹೊರಗೆ ಬಂದು ತಿಂಡಿ ತಿನ್ನಲು ನಿಯೋಜಿಸಿದ ಸ್ಥಳದಲ್ಲಿ ತಿಂದೆವು. ಟೊಯ್ಲೆಟ್ಟಿಗೆ ಹೋಗಿ ನಂತರ ಹತ್ತಿರದಲ್ಲಿಯೇ ಇದ್ದ ಟವರ್ ಜಲಪಾತವನ್ನು ನೋಡಲು ಕಾಲ್ನಡಿಗೆ ದಾರಿಯಲ್ಲಿ ಹೋಗಿ ನೋಡಿಕೊಂಡು ಬಂದೆವು. ಸ್ವಲ್ಪ ವಿರಮಿಸಿದನಂತರ ಪಾರ್ಕಿನ ಗ್ರ್ಯಾಂಡ್ ಕ್ಯಾನಿಯನ್ ಕಡೆಗೆ ಮುಂದುವರಿದೆವು.
![](https://blogger.googleusercontent.com/img/b/R29vZ2xl/AVvXsEhMsQ5dyBDVLL1lw5ckhEA4aBM_Sk1QX8RAbf3U0tweqAHUARd2ZycLQ75FdqB6RnDgPoyAVEEoXVGawrPHARPYzIG7upx2fDxM-TugQFonJebSLepfylrESAi4XQDCRwA23uv5T0l-eC5nAULeWwhQq1cIqSNaZ5QvEVeyNzdpLg78-X8tdD6xJ8wzYg/s320/DSC_0527.JPG) |
ಟವರ್ಪಾಯಿಂಟ್ ಜಲಪಾತ |
ಯೆಲ್ಲೊಸ್ಟೋನ್ ಗ್ರ್ಯಾಂಡ್ ಕ್ಯಾನಿಯನ್:ಯೆಲ್ಲೊಸ್ಟೋನ್ ಗ್ರ್ಯಾಂಡ್ ಕ್ಯಾನಿಯನ್ ಬಹುಷಃ ಅದು ಉಂಟಾದ ದಿನ, 160,000 ರಿಂದ 140,000 ವರ್ಷಗಳ ಹಿಂದೆ, ಈಗಿನಷ್ಟು ಉದ್ದಗಲ ಇದ್ದಿರಲಿಕ್ಕಿಲ್ಲವೆಂದು ವಿಜ್ಞಾನಿಗಳ ಅಭಿಪ್ರಾಯ. ಅದೀಗ 1000ಅಡಿ ಆಳವಾಗಿ 1,500-4,000ಅಡಿ ಅಗಲವುಳ್ಳದ್ದಾಗಿದ್ದು 20 ಮೈಲುಗಳ ಉದ್ದವಾಗಿದೆ, ಎರಡು ಜಲಪಾತಗಳನ್ನೊಳ- ಗೊಂಡಿದೆ… ಮೇಲ್ಜಲಪಾತ ಮತ್ತು ಕೆಳಜಲಪಾತ. ಗ್ರ್ಯಾಂಡ್ಲೂಪ್ ರಸ್ತೆಯ ಫಿ಼ಶಿಂಗ್ ಬ್ರಿಜ಼್ ಅಂಚಿನಿಂದ ಹರಿದುಬರುವ(ದಕ್ಷಿಣದಿಂದ ಈಶಾನ್ಯ ದಿಕ್ಕಿಗೆ ತಿರುಗಿ ಹರಿಯುವ) ಯೆಲ್ಲೊಸ್ಟೋನ್ ನದಿಯ ಮೇಲ್ಜಲಪಾತ 109 ಅಡಿಗಳೆತ್ತರದಿಂದಲೂ ಕೆಳಜಲಪಾತ 308 ಅಡಿಗಳೆತ್ತರ- ದಿಂದಲೂ ದುಮ್ಮಿಕ್ಕುತ್ತವೆ. ಇವುಗಳ ನೋಟಗಳಿಗಾಗಿ ನದಿಯ ಎರಡೂ ಬದಿಯಲ್ಲಿ ನಡಿಗೆ ದಾರಿ ಮತ್ತು ವಾಹನಗಳ ಓಡಾಟಕ್ಕೆ ಉತ್ತರ ಮತ್ತು ದಕ್ಷಿಣ ದಂಡೆ ರಸ್ತೆ ಮಾಡಲಾಗಿದೆ. ನಾವು ಎರಡೂ ಕಡೆಗೂ ಹೋಗಿ ಜಲಪಾತಗಳನ್ನು ವೀಕ್ಷಿಸಿದೆವು. ಪ್ರತಿಕ್ಷಣ, ಪ್ರತಿದಿನ ಯಾವಾಗಲೂ ಹೈಡ್ರೊತರ್ಮಲ್ ಕ್ರಿಯೆಗೆ ಒಳಗಾಗುವ ನದಿಯ ಪಾತಳಿ ಮತ್ತು ದಂಡೆಗಳು ಎಡೆಬಿಡದೆ ಕೊರೆತಕ್ಕೊಳಗಾಗಿದೆ. ಜ್ವಾಲಾಮುಖಿಯ ಲಾವಾದ ಅಗ್ನಿಶಿಲೆಯ ಗಟ್ಟಿಯಾದ ಕಲ್ಲುಗಳ ಮೇಲಿಂದ ದುಮುಕುವ ಜಲಪಾತಗಳು ಅಲ್ಲಿ ಸವೆತವನ್ನು ತಡೆದುಕೊಂಡಿವೆ. ಕೊರಕಲಿನ(ಕ್ಯಾನಿಯನ್) ಎರಡೂ ಕಡೆಯ ದಂಡೆಗಳು ಹಾಗಿಲ್ಲ… ಶಿಥಿಲವಾದ rhyolite ಗೊರಜುಗಲ್ಲುಗಳಿಂದ ಕೂಡಿದ ಹಳದಿ, ಕೆಂಪು, ಕಿತ್ತಳೆ ಬಣ್ಣಗಳ ಕೆಸರುರಾಡಿಯ ಮಣ್ಣಿನ ದಂಡೆಗಳು. ಮಣ್ಣಿನ ಸಂದುಗಳಿಂದ ಅಲ್ಲಲ್ಲಿ ಚಿಕ್ಕಪುಟ್ಟ ಕೊಸರಿನ ಗೈಜ಼ರುಗಳು ನೀರಾವಿಯನ್ನು ಬುಗ್ಗೆಬಗ್ಗೆಯಾಗಿ ಹೊರಹಾಕುವುದನ್ನು ಕಾಣಬಹುದು.
![](https://blogger.googleusercontent.com/img/b/R29vZ2xl/AVvXsEj2jay4q7CDIuCutOlX0xEdDc1OaeFJxgo4rPBpVWZrVlM4ZTo9x435LoiKwzUcpXOM6YsRzzBLtR5d1BYQdykrkgSHtADGpdiqxzG42amtEm6JqRySv2LaSC5AB6UCHh89jbqyG656r5EmnRWvlb1weR5lhxCxvDTXC9Y_Bwl84g0AcmwZS0yMokwIig/s320/DSC_0577.JPG) |
ಗ್ರ್ಯಾಂಡ್ ಕ್ಯಾನಿಯನ್ |
ಇದೊಂದು ಭೂಗರ್ಭಶಾಸ್ತ್ರದ ವಿದ್ಯಾರ್ಥಿಗಳಿಗೆ ಮತ್ತು ವಿಜ್ಞಾನಿಗಳಿಗೆ ಒಂದು ಅಭ್ಯಾಸದ ಪ್ರಾತ್ಯಕ್ಷಿಕೆ. ಕ್ಯಾನಿಯನ್ ದಂಡೆಗಳ ಅಲ್ಲಲ್ಲಿ ಎತ್ತರವಾದ ಕೋಡು ದಿಬ್ಬಗಳ ಮೇಲೆ ಕಡ್ಡಿಪುರಲೆಗಳ ಗೂಡುಗಳನ್ನೂ ಕಾಣಬಹುದು… ಅವು ಕಡಲು/ಮೀನು ಡೇಗೆ, ಒಂದು ರೀತಿಯ ಹದ್ದು(Osprey) ಗಳ ವಾಸಸ್ಥಳಗಳಾಗಿದ್ದು ಅವುಗಳ ಹಾರಾಟವನ್ನೂ ಆಗಾಗ ಕಾಣಬಹುದು.
ಕ್ಯಾನಿಯನ್ ನಡೆದಾರಿಗಳ ಆರ್ಟಿಸ್ಟ್ ಪಾಯಿಂಟ್ ಮತ್ತು ಇನ್ಸ್ಪಿರೇಷನ್ ಪಾಯಿಂಟ್:ದಕ್ಷಿಣದ ದಂಡೆಯಿಂದ ಕೆಳಜಲಪಾತದ ಕಾಡಿನ ಹಿನ್ನೆಲೆಗಿಟ್ಟುಕೊಂಡು ನೋಡಬಹುದಾದ ಈ ಸ್ಥಳಕ್ಕೆ 'ಆರ್ಟಿಸ್ಟ್ ಪಾಯಿಂಟ್' ಎಂದು ನಾಮಕರಿಸಿದ್ದಾರೆ. ಇದೇ ವೀಕ್ಷಣೆಯನ್ನು ಉತ್ತರದ ದಂಡೆಯಿಂದ ನೋಡಲಿರುವ ಸ್ಥಳಕ್ಕೆ 'ಇನ್ಸ್ಪಿರೇಷನ್ ಪಾಯಿಂಟ್' ಎಂದು ಕರೆದಿದ್ದಾರೆ.
![](https://blogger.googleusercontent.com/img/b/R29vZ2xl/AVvXsEirhCSGIhgPLlqA3VWOxtxA1V5vRZAo0C0sIlQyRUMG29dtNLwo5Q6bou2_oJYmxUc--BNoAKrVtUm8nqJ4Fw29LFVStmSl3cgHS2IbJpuWXlzYgEhQ_WYAR0gAAZ-oCybVzY2lIQL1ZWbcliDSoYhU01Yd2bi3v-2KixGjlBfskmpPU9FRYEvm-A235w/s320/DSC_0547.JPG) |
ಮೇಲ್ಜಲಪಾತ |
ಇಲ್ಲೀ ಸ್ಥಳಗಳಲ್ಲಿ ಕಲಾವಿದರು ಅವರ ಕ್ಯಾನ್ವಾಸ್ ಮೇಲೆ ನೋಟವನ್ನು ಕೃತಿಗಿಳಿಸಲು ಉತ್ತಮವಾದ ಸ್ಥಳವಾದುದರಿಂದ 1883ರಲ್ಲಿ Frank Jay Haynes ಎಂಬ ಛಾಯಾಗ್ರಾಹಕ ತನಗೆ ಸರಿಯಾಗಿ ತಿಳಿಯದೆ ಇದಕ್ಕೆ ಆ ಹೆಸರಿನ್ನಿಟ್ಟು ಕರೆದಿದ್ದಾನೆ. ಆದರೆ ಉತ್ತರದ ದಂಡೆಯಿಂದ ಮೊದಲಿಗೆ 1872ರಲ್ಲಿ 'ತಾಮಸ್ ಮೊರಾನ್' ಎಂಬ ಕಲಾವಿದ ಕೆಳಜಲಪಾತದ ದೃಶ್ಯವನ್ನು ಇನ್ಸ್ಪಿರೇಷನ್ ಪಾಯಿಂಟ್ನಿಂದ ಚಿತ್ರಿಸಿದ್ದನು. ಆದಾಗ್ಯೂ ದಕ್ಷಿಣ ದಂಡೆಯ ಆ ಸ್ಥಳಕ್ಕೆ 'ಆರ್ಟಿಸ್ಟ್ ಪಾಯಿಂಟ್' ಎಂಬ ಹೆಸರು ಹಾಗೇ ಅಂಟಿಕೊಂಡುಬಿಟ್ಟಿದೆ.
![](https://blogger.googleusercontent.com/img/b/R29vZ2xl/AVvXsEip1uR6xpmPqvZ0Vzn3Yf7P4wSqfU0meKoc403kH7Rfcivo5R5eAXWfcx43Jr-t0sNJqZx4PODwhaYoAFJyHo-jIxBKj4h6X7WdoVo7AmNJ1p5WvnZmXk-O4rCGuIoSxJkUnUg7pVUwflYQq27nhgGZKxlBhtN3ofPxoDQvM4hWBlNKZqcrA8JtRDt1og/s320/DSC_0567.JPG) |
ಕೆಳಜಲಪಾತ |
ಯೆಲ್ಲೊಸ್ಟೋನ್ ಗ್ರ್ಯಾಂಡ್ ಕ್ಯಾನಿಯನ್ನ ಹತ್ತಿರದಲ್ಲಿ ಒಂದು ಪ್ರವಾಸಿಗಳ ತಾಣವನ್ನು ನಿರ್ಮಿಸಲಾಗಿದೆ. ಇಲ್ಲಿ ಈ ಸ್ಥಳಕ್ಕೆ ಕ್ಯಾನಿಯನ್ ವಿಲೇಜ್ ಎಂದೇ ನಾಮಕರಣ ಮಾಡಿದ್ದಾರೆ. ಸಾಮಾನ್ಯವಾಗಿ ಕಾಲುನಡಿಗೆಯಲ್ಲಿ ಸುತ್ತುವವರಿಗೆ ಇಲ್ಲಿ ವಸತಿ ಸೌಕರ್ಯವಿದೆ. ಕ್ಯಾನಿಯನ್ ಜಲಪಾತಗಳ ವೀಕ್ಷಣೆಗೆ ನಡಿಗೆಯಲ್ಲಿ ಸುತ್ತುವವರಿಗೆ ಮತ್ತು ವಾಶ್ಬರ್ನ್ ಪರ್ವತಕ್ಕೆ ಹೋಗುವ ಹೈಕಿಂಗ್ ಪ್ರಿಯರಿಗೆ ಹೇಳಿ ಮಾಡಿಸಿದ ತಾಣ.
ಯೆಲ್ಲೊಸ್ಟೋನ್ ಗ್ರ್ಯಾಂಡ್ ಕ್ಯಾನಿಯನ್ ವೀಕ್ಷಣೆ ಮುಗಿಸಿದ ನಾವು, ಬಲ ಗ್ರ್ಯಾಂಡ್ ಲೂಪ್ ರಸ್ತೆಯಿಂದ ಎಡ ಲೂಪ್ ರಸ್ತೆಯಲ್ಲಿನ ಓಲ್ಡ್ ಫ಼ೇತ್ಫು಼ಲ್ ಇನ್ ಕಡೆಗೆ ಹೊರೆಟೆವು. ದಾರಿಯಲ್ಲಿ ಹೇಡನ್ ಕಣಿವೆ ಭಾಗದಲ್ಲಿ ಕೆಸರು ಬುಗ್ಗೆಗಳಿಗೆ ಹೆಸರಾದ ಡ್ರ್ಯಾಗನ್ ಮೌತ್ ಬುಗ್ಗೆ ಮತ್ತು ಬ್ಲ್ಯಾಕ್ ಬುಗ್ಗೆಗಳಿಗೆ ಭೇಟಿ ನೀಡಿದೆವು. ಇವು ಕೆಸರು ನೀರು ಬಗ್ಗೆಗಳು, ಡ್ರ್ಯಾಗನ್ ಮೌತ್ ಕೆಸರು ನೀರಿನಿಂದ ಕೂಡಿದೆ. ಅದರ ಗೋಡೆಯ ಸಂದುವಿನಲ್ಲಿರುವ ಅಗಲ ಬಾಯಿಯಿಂದ ಹೊರಬರುವ ಚಿಮ್ಮುವಿಕೆಯ ಶಬ್ದ, ಡ್ರ್ಯಾಗನ್ ಘೀಳಿಟ್ಟು ಹೊರಡಿಸುವ ಶಬ್ದಾನುಕರುಣೆಯಿಂದಾಗಿ ಅದಕ್ಕೆ ಆ ಹೆಸರು ಬಂದಿದೆ. ಕಪ್ಪು ಬಣ್ಣದ ಕೆಸರು ನೀರು ತುಂಬಿಕೊಂಡು ಕುದಿಯುವುದರಿಂದ ಇನ್ನೊಂದಕ್ಕೆ ಬ್ಲ್ಯಾಕ್ ಬುಗ್ಗೆಯೆಂಬ ನಾಮಕರಣ ಬಂದಿವೆ.
![](https://blogger.googleusercontent.com/img/b/R29vZ2xl/AVvXsEh5vgWOaO30yYGppm7MxR8JhE_rRNQZjxQ5wxWkFk6Q7PZ9-1mkRn1trqKsOYXTtVCViWjpcYeihHdQNixidUTho-eO2-02xwhUtpvCEVktOFM-pbwo04V3fhR46f5aL2ZcPY-BPfSr0D2RxHRYfonIWLtqGuVqYDtophz2GmKWz2C5FQzj0mUCs_E-lA/s320/DSC_0620.JPG) |
ಬ್ಲ್ಯಾಕ್ ಬುಗ್ಗೆ |
ಅವುಗಳನ್ನು ನೋಡಿಕೊಂಡು ಮುಂದೆ ಹೊರಟ ನಾವೀಗ ಯೆಲ್ಲೊಸ್ಟೋನ್ನ ಸರೋವರದ ದಂಡೆಯಲ್ಲಿ ಫಿ಼ಶಿಂಗ್ ಬ್ರಿಜ಼್ ಕಡೆಯಿಂದ ಹೋಗಬೇಕಾದ ರಸ್ತೆಯಲ್ಲಿ ಪ್ರಯಾಣ. ಅಲ್ಲಿ ಸಿಗುವ ಫಿ಼ಶಿಂಗ್ ಬ್ರಿಜ಼್ ಬಳಿ ಕಾರು ನಿಲ್ಲಿಸಿ ಇಳಿದು ಸರೋವರದ ಅಂಚಿನಲ್ಲಷ್ಟು ದೂರ ನಡೆದು ಬ್ರಿಜ಼್ ದಾಟಿದೆವು. ಸರೋವರವೊಂದು ಕೌತುಕವೇ ಆಗಿತ್ತು. ಅಲ್ಲಲ್ಲಿ ಪುಂಕಾನುಪುಂಕವಾಗಿ, ಸರೋವರದ ಮಧ್ಯೆ ಮತ್ತು ರಸ್ತೆಗಾತುಕೊಂಡ ಸರೋವರದಂಚಿನಲ್ಲಿ ನೀರಾವಿಯು ಹೊರಸೂಸುತ್ತಲೇ ಇತ್ತು. ಇದೊಂದು ಅದ್ಭುತ-ರಮ್ಯ ಪ್ರಯಾಣವಾಗಿತ್ತು. ಲೇಕ್ ಬಗ್ಗೆ ಮುಂದೆ ಓದಿರಿ.
ಯೆಲ್ಲೊಸ್ಟೋನ್ ಸರೋವರ(ಲೇಕ್) ಮತ್ತು ನದಿ:ಯೆಲ್ಲೊಸ್ಟೋನ್ ಸರೋವರವು ಉತ್ತರ ಅಮೆರಿಕದಲ್ಲಿನ ಒಂದು ಅತಿ ಎತ್ತರದಲ್ಲಿರುವ(7000 ಅಡಿಗಳ ಮೇಲೆ) ಸರೋವರ… ಸರಾಸರಿ 138 ಅಡಿ ಅಳದಲ್ಲಿ 286 ಚದರ ಮೈಲಿಗಳವರೆಗೆ ಆವರಿಸಿಕೊಂಡಿದೆ. ಇದರ ಹೊರಬಾಯಿ ಇರುವುದು ಫಿ಼ಶಿಂಗ್ ಬ್ರಿಡ್ಜ಼್ನಲ್ಲಿ, ಅಲ್ಲಿ ಯೆಲ್ಲೊಸ್ಟೋನ್ ನದಿಯು ಉತ್ತರಕ್ಕೆ ಹರಿದು ಆನಂತರ ಈಶಾನ್ಯಕ್ಕೆ ಹರಿಯುತ್ತದೆ. ಡಿಸೆಂಬರ್ ತಿಂಗಳಿನಿಂದ ಮೇ-ಜೂನ್ ತಿಂಗಳುಗಳವರೆಗೆ ಚಳಿಗಾಲದಲ್ಲಿ ಬೀಳುವ ಹಿಮದಿಂದ ತುಂಬಿಕೊಳ್ಳುತ್ತದೆ.
![](https://blogger.googleusercontent.com/img/b/R29vZ2xl/AVvXsEheYY988GzElt8slBrVMoJrpyGPUYItHEy7YOiA7UJnvSIlQyydkbxszPDOLAHO9mhXBMBBp12RLekAs1Q1SesLa5wWaF9sKhqfJR0WP0RJrF5QpZRYswm9xxWN5X1CywmdiPCKbr0DlR3VsqKg4d98fqO4bGcUDLgJ6OS6perpCU9cXzquBtFSgziLBw/s320/DSC_0611.JPG) |
ಯೆಲ್ಲೊಸ್ಟೋನ್ ಸರೋವರ |
ಸರೋವರವು ಯಲ್ಲೊಸ್ಟೋನ್ "ಕಾಲ್ಡೆರಾ"ದ ಅಂಚುಗಳಿಗೆ ಒಳಪಟ್ಟಿರುವುದರಿಂದ ಶಕ್ತಯುತ ಭೂಗರ್ಭೀಯ ಕಂಪನಗಳು ಮತ್ತು ಹಿಮಕಟ್ಟುವಿಕೆ ಇವುಗಳ ಪ್ರಭಾವದಿಂದ ಪ್ರತಿವರ್ಷ ಸರೋವರದ ಚಿಂದಿಯಂಥ ತೀರಪ್ರದೇಶ ಮತ್ತು ಮಧ್ಯದ ಬೇಸಿನ್ ಅನ್ನು ರೂಪಿಸಿವೆ/ರೂಪಿಸುತ್ತಿವೆ. ಜ್ವಾಲಾಮುಖಿಯ ಸಿಡಿತ ಮತ್ತು ಅದರ ಅಗ್ನಿಶಿಲೆಗಳನ್ನಾಧರಿಸಿ(Pyroclastic explosion activity) ಪಶ್ಚಿಮದ ಬೆರಳನ್ನು 174,000 ವರ್ಷಗಳ ಹಿಂದೆಯೇ ಸೃಷ್ಟಿಸಿದೆಯೆಂದು ವಿಜ್ಞಾನಿಗಳು ಅಭಿಪ್ರಾಯಪಟ್ಟಿದ್ದಾರೆ. ಸಾಮಾನ್ಯವಾಗಿ ವರ್ಷದಲ್ಲಿ 1000ದಿಂದ 3000ದವರೆಗೆ ಸರೋವರದಡಿಯಲ್ಲಿ ಉಂಟಾಗುವ ಭೂಕಂಪನಗಳು ಸರೋವರದ ತಳವನ್ನು ಕೆಲವೆಡೆ ಮೇಲೆತ್ತುವ ಮತ್ತು ಕೆಲವೆಡೆ ಕೆಳಕ್ಕಿಳಿಸುವ ಘಟನೆಗಳ ಕ್ರಿಯೆಯಿಂದಾಗಿ ಸರೋವರದ ನೀರಂಚಿನ ತೀರಪ್ರದೇಶಗಳು ಪ್ರತಿವರ್ಷ ಪುನರೂಪಿತವಾಗುತ್ತಿವೆ. ಸರೋವರದಲ್ಲಿನ ಜಲಚರ ವನ್ಯಜೀವಿಗಳನ್ನು ಪಾರ್ಕಿನ ಆಡಳಿತ ಸಂರಕ್ಷಿಸುವ ಸೇವೆಯನ್ನೊದಗಿಸಿದೆ. ಸರೋವರದೊಳಕ್ಕೆ ದಾಳಿಯಿಡುವ ಟ್ರೌಟ್(ಒಂದು ಬಗೆಯ ಮೀನುಗಳು)ಗಳಿಂದ ಸ್ಥಳೀಯವಾಗಿ ವಾಸಿಸುವ ಕಟ್ತ್ರೋಟ್ ಟ್ರೌಟ್ಗಳ ಮೇಲೆ ಮಾಡುವ ಆಕ್ರಮಣಗಳನ್ನು ಪಾರ್ಕಿನ ಸಿಬ್ಬಂದಿ ಕಡಿಮೆಗೊಳಿಸುವ ಪ್ರಯತ್ನವನ್ನು ಸದಾ ಮಾಡುತ್ತಿರುತ್ತಾರೆ.
ನದಿ, ಯೆಲ್ಲೊಸ್ಟೋನ್, ಫಿ಼ಶಿಂಗ್ ಸೇತುವೆ ಕಡೆಯಿಂದ ಉತ್ತರಕ್ಕೆ ಹರಿದು ಯೆ. ಗ್ರ್ಯಾಂಡ್ ಕ್ಯಾನಿಯನ್ನಲ್ಲಿ ಎರಡು ಜಲಪಾತಗಳನ್ನು ದುಮ್ಮಿಕ್ಕಿ ಆನಂತರ ಮೊಂಟಾನ ರಾಜ್ಯದಲ್ಲಿ ಈಶಾನ್ಯಾಭಿಮುಖವಾಗಿ ತಿರುಗಿ ಒಟ್ಟು ಪ್ರಾರಂಭದಿಂದ 692 ಮೈಲುಗಳವರೆಗೆ ಹರಿದು ಹಲವಾರು ನದಿಗಳನ್ನು ಮಿಳಿತಗೊಳಿಸಿಕೊಂಡು ಬಹುವಾಗಿ ಮೊಂಟಾನ ರಾಜ್ಯದಲ್ಲಿಯೇ ಹರಿಯುತ್ತಾ "ಉತ್ತರ ಡಕೋಟ" ರಾಜ್ಯದ ಪಶ್ಚಿಮದಲ್ಲಿ ಮಿಸ್ಸೋರಿ ನದಿಯ ಉಪನದಿಯಾಗಿ ಸೇರುತ್ತದೆ, ಎಂದು ಜಲಪಾತಗಳ ಬಗ್ಗೆ "ಯೆಲ್ಲೊಸ್ಟೋನ್ ಗ್ರ್ಯಾಂಡ್ ಕ್ಯಾನಿಯನ್"ನ ವಿವರಣೆಯಲ್ಲಿ ತಿಳಿಸಿದೆ.
ಓಲ್ಡ್ ಫ಼ೇತ್ಫು಼ಲ್ ಇನ್ ಬಳಿ ನನ್ನನ್ನೂ ಮತ್ತು ನನ್ನ ಪತ್ನಿ ವಸಂತಳನ್ನೂ ಇರಿಸಿ ಮತ್ತೊಮ್ಮೆ ಹಿಂದಿನ ದಿನ ನೋಡಿದ ಆರ್ಟಿಸ್ಟ್ಸ್' ಮಡ್ ಪಾಟ್ಸ್ ಬಳಿಗೆ ಹೋಗಿ ಮತ್ತಷ್ಟು ಮೇಲ್ಕೋನದಿಂದ ಛಾಯಾಚಿತ್ರ ತೆಗೆದುಕೊಂಡುಬರಲು ಚಿನ್ಮಯಿ ಮತ್ತು ಸಿಂಚನ ಹೋದರು… ಸುಮಾರು ಒಂದೂವರೆ ಗಂಟೆ ಕಳೆದು ಹಿಂದಿರುಗಿ ಬಂದರು. ನಾನು ಮತ್ತು ವಸಂತ ಈಮಧ್ಯೆ ಓಲ್ಡ್ ಫ಼ೇತ್ಫು಼ಲ್ ಬುಗ್ಗೆ ಸಿಡಿದುಗಿಯುವುದನ್ನು ಮತ್ತೊಮ್ಮೆ ವೀಕ್ಷಿಸಿದೆವು. ಅಲ್ಲಿಂದ ನಮ್ಮ ಮುಂದಿನ ಪಯಣ ಮ್ಯಾಮ್ಮಾತ್ ಬುಗ್ಗೆಗಳ ಕಡೆಗಾಗಿದ್ದಿತು. ದಾರಿ ಮಧ್ಯದಲ್ಲಿ ನೋರಿಸ್ ಗೈಜ಼ರ್ ಬೇಸಿನ್ ಎಡಕ್ಕಿರಿಸಿದ ಬಳಿಕ ಇಲ್ಲಿ ಎಡ ಮತ್ತು ಬಲ ಗ್ರ್ಯಾಂಡ್ ಲೂಪ್ ರಸ್ತೆಗಳ ಮಧ್ಯದ ಸಂಪರ್ಕ ರಸ್ತೆಯಿದೆ. ಇಲ್ಲಿಂದ ಮುಂದೆ ನೇರ ಹೋಗುವ ರಸ್ತೆ ಮ್ಯಾಮ್ಮತ್ ಬುಗ್ಗೆಗಳ ಕಡೆಗೆ ಹೋಗುತ್ತದೆ.
ನೋರಿಸ್ ಗೈಜ಼ರ್ ಬೇಸಿನ್: ![](https://blogger.googleusercontent.com/img/b/R29vZ2xl/AVvXsEggEq0prARCFIaWMinNISPBNKi7hJZBRxM9hNqzbWKOjzhjsvvLsLkpdx3MkKsX15-3fTu8o8rORAxspJOVloR5irjN4jRqhKifF3TSMvMu0Kk_Ls50cWAXERXg9zvHkTKhgio-gARenhG8MVqhJMavpkK3AgW-s1R07x75Lp6NLt7cpxB6Qnc0JchQ-w/s320/Screenshot_2022-05-31_20-55-47.png) |
ನೋರಿಸ್ ಗೈಜ಼ರ್ ಪ್ರದೇಶದ ನಕ್ಷೆ |
ನೋರಿಸ್ ಗೈಜ಼ರ್ ತಾಣ, ಇದೊಂದು ಹಳೆಯ, ಅತಿಹೆಚ್ಚು ತಾಪಮಾನವಿರುವ, 459°F (237°C), ಭೂ ಮೇಲ್ಭಾಗದಿಂದ ಕೇವಲ 1,087 ಅಡಿ (326ಮೀ) ಆಳದಲ್ಲಿ ಹೊಂದಿರುವ, ವೈಜ್ಞಾನಿಕವಾಗಿ ಕೊರೆದು ಅಳತೆಮಾಡಲಾದ ಯೆಲ್ಲೊಸ್ಟೋನ್ನ ಒಂದು ತರ್ಮಲ್ ಸ್ಥಳ. ಕೆಲವೇ ಕೆಲವು 199°F ಕುದಿಯುವ ಹಂತದ ತರ್ಮಲ್ ಮೇಲ್ಮೈಗಳು ನೋರಿಸ್ನಲ್ಲಿವೆ, ಅವು 115,000 ವರ್ಷಗಳಷ್ಟು ಹಿಂದಿನಿ ಸಾಕ್ಷ್ಯವನ್ನು ಹೊಂದಿವೆ. ಇವುಗಳ ಅವತಾರಗಳು ದಿನವಹಿ ಬದಲಾವಣೆಗಳಿಗೆ ಒಳಡಪಡುತ್ತಿರುತ್ತವೆ. ಈ ಬದಲಾವಣೆಗಳು, ಭೂಕಂಪನ ಮತ್ತು ನೀರಿನ ಲಭ್ಯತೆ ಅಲಭ್ಯತೆಯನ್ನು ಅವಲಂಬಿಸಿ ಮಾರ್ಪಾಡಾಗುತ್ತಿರುತ್ತವೆ. ನೋರಿಸ್ನ ಬಹುಪಾಲು ನೀರು ಆಮ್ಲೀಯವಾಗಿದೆ, ಆಸಿಡ್ ಗೈಜ಼ರುಗಳೂ ಸೇರಿ, ಆದರವು ವಿರಳವಾಗಿವೆಯೆಂದು ಈ ತಾಣದಲ್ಲಿ ಹಾಕಲಾಗಿರುವ ಮಾಹಿತಿ ಫಲಕಗಳು ಹೇಳುತ್ತವೆ. ಉದಾಹರಣೆಗೆ: ಸ್ಟೀಮ್ಬೋಟ್ ಗೈಜ಼ರ್, ಸಿಸ್ಟರ್ನ್ ಬುಗ್ಗೆ, ಪರ್ಪೆಚುಯೆಲ್ಬುಗ್ಗೆ, ವ್ಹೇಲ್'ಸ್ ಮೌತ್ ಮತ್ತು ಎಕಿನಸ್ ಗೈಜ಼ರ್ ಮುಖ್ಯವಾದವು.
![](https://blogger.googleusercontent.com/img/b/R29vZ2xl/AVvXsEhrRefyGL2HaNIq8VXr3ENMcmexXhpHv8kaDvHuNLwGn6F5oE5lmYXVqJZMnQYVDRl3aqSOuklUvVlrilXwtyIL-k9Govp4Nmlkqz-yKAzeqEyJxiupaXOCqlWQG13L-UskgnvqbAYcvD8vICGNy5zQ1IYz8W3Yz3GwWPjTuvT8pUwalITlEehGZnAnpQ/s320/Cistern-Spring.jpg) |
ಸಿಸ್ಟರ್ನ್ ಬುಗ್ಗೆ |
ನೋರಿಸ್ ಗೈಜ಼ರ್ ತಾಣದಲ್ಲಿ ಎರಡು ಪ್ರತ್ಯೇಕ ತಾಣಗಳಿವೆ… ಪೋರ್ಸಲೆನ್ ಮತ್ತು ಬ್ಯಾಕ್ ಬೇಸಿನ್ ತಾಣಗಳು. ಪೋರ್ಸಲೆನ್ ತಾಣದಲ್ಲಿ ಮರಗಳು ಬೆಳೆಯುವುದಿಲ್ಲ, ಮುಕ್ಕಾಲು ಗಂಟೆಯ ಮರದಟ್ಟಣಿಗೆ ನಡಿಗೆ. ಮನುಷ್ಯನ ಇಂದ್ರಿಯಗಳಿಗೆ ಬಣ್ಣ, ವಾಸನೆ ಮತ್ತು ಶಬ್ದಗಳ ವಿಶಿಷ್ಟ ಅನುಭವ ನೀಡುತ್ತವೆಂದು ಇಲ್ಲಿನ ಮಾಹಿತಿಯಿದೆ. ಸಮಾನ್ಯವಾಗಿ ಬಯಲು, ಬಿಳುಪಾದ ಪೋರ್ಸಲೇನ್ ಅಕ್ಕಳಿಕೆಗಳನ್ನು ಹೊಂದಿದೆ. ಬ್ಯಾಕ್ ಬೇಸಿನ್ ತಾಣವು ದಟ್ಟವಾದ ಮರಗಳ ಪ್ರದೇಶವನ್ನು ಹೊಂದಿದೆ. ಒಂದೂವರೆ ಮೈಲಿ ದೂರದ ಬಯಲಿನಿಂದಾವೃತವಾದ ಮರದಟ್ಟಣಿಗೆ ದಾರಿ. Philetus W. Norris, ಯೆಲ್ಲೊಸ್ಟೋನ್ನ ಎರಡನೇ ಸೂಪರಿಂಟೆಂಡೆಂಟ್, ಎಂಬಾತನು ಮೊದಲಿಗೆ ಈ ತಾಣದ ವಿವರವಾದ ವರದಿಯನ್ನು ನೀಡಿದುದರಿಂದ ಈ ತಾಣಕ್ಕೆ "ನೋರಿಸ್ ಗೈಜ಼ರ್ ಬೇಸಿನ್" ಎಂದೇ ಹೆಸರಿಡಲಾಗಿದೆ.
ಮ್ಯಾಮ್ಮತ್ ಹಾಟ್ ಬುಗ್ಗೆಗಳ ಕಡೆಗಿನ ದಾರಿಯಲ್ಲಿ ರಸ್ತೆ ರಿಪೇರಿಯಿದ್ದುದರಿಂದ ನಮ್ಮ ಪ್ರಯಾಣಕ್ಕೆ ಅಡಚಣೆಯಾಗಿದ್ದಿತು. ಅಲ್ಲಿ ಒಂದು ಕಡೆಯ ದಾರಿಯನ್ನು ಉಪಯೋಗಿಸಿ ಆಕಡೆ ಮತ್ತು ಈಕಡೆ ಹೋಗುವ ವಾಹನಗಳನ್ನು ಸಿಗ್ನಲ್ ಮೂಲಕ ನಿಯಂತ್ರಿಸಿ ದಾರಿ ಬಿಡುತ್ತಿದ್ದರು, ಅರ್ಧ ಗಂಟೆ ತಡವಾಯಿತು. ನಾವು ಮ್ಯಾಮ್ಮತ್ ಹಾಟ್ ಸ್ಪ್ರಿಂಗ್ ಸ್ಥಳಕ್ಕೆ ತಲುಪುವ ವೇಳೆಗೆ ಗಂಟೆ 7.51, ಅಲ್ಲಿಂದ ಹಿಂದಕ್ಕೆ ಹೊರಟ ವೇಳೆ 8.59 ಗಂಟೆ.
ಮ್ಯಾಮ್ಮತ್ ಹಾಟ್ ಸ್ಪ್ರಿಂಗ್ ಮತ್ತು ಟ್ರ್ಯಾವರ್ಟೈನ್ ಮಹಡಿ ಅಂತಸ್ತು ನಿಕ್ಷೇಪಗಳು:ಇಲ್ಲಿದು "ಟೆರೇಸ್ ಮೌಂಟೇನ್" ಎಂಬ ಬೆಟ್ಟ ಪ್ರದೇಶವನ್ನೇ ಸೃಷ್ಟಿಸಿದೆ. ಟ್ರ್ಯಾವರ್ಟೈನ್ ಮಹಡಿ ಅಂತಸ್ತುಗಳ ಶೇಖರಣೆಗಳು(ನಿಕ್ಷೇಪಗಳು) ಸುಮಾರು 400,000 ವರ್ಷಗಳ ಹಿಂದೆಯೇ ಸ್ಥಾಪಿಸಲ್ಪಟ್ಟಿವೆ. ಯೆಲ್ಲೊಸ್ಟೋನ್ನ ದಾಖಲೆಗಳ ಪ್ರಕಾರ ಈ ಬೆಟ್ಟ ಪ್ರದೇಶ ಅತೀ ಹಳೆಯ ಸೃಷ್ಟಿತ ತರ್ಮಲ್ ಅಂತಸ್ತು ನಿಕ್ಷೇಪಗಳಾಗಿವೆ! ಇಲ್ಲಿ ಪ್ರವಾಸಿಗರ ಜನಸಂದಣಿ ಓಲ್ಡ್ ಫ಼ೇತ್ಫು಼ಲ್ನಲ್ಲಿನ ಪ್ರದೇಶದಲ್ಲಿದ್ದಂತೆ ಇರಲಿಲ್ಲ. ವಿರಳವಾಗಿದ್ದಿತು.
![](https://blogger.googleusercontent.com/img/b/R29vZ2xl/AVvXsEjq9sKJUDP-q1kCkzgFufd45XddhPeSYiS78PWYTaG84H5S4CgFMrgvaTUuJ-AcrC6dvEprB4YqiBx2eZe7UWpnAx6U5EBEufGKIivb44ejdwX-hCOyIN3h0JJuPV80yhiQkPQORxaizQoA8aIpPne12lMPKIr8senYgWOmWij0xGtrbSPFj85Z7WFamw/s320/DSC_0681.JPG) |
ಸುಣ್ಣ ಮಿಶ್ರಿತ ಟ್ರ್ಯಾವರ್ಟೈನ್ |
ಪ್ರತಿವರ್ಷ ಯೆಲ್ಲೊಸ್ಟೋನ್ನಲ್ಲಿ ಬೀಳುವ ಮಳೆನೀರು ಮತ್ತು ಹಿಮಕರಗಿದ ನೀರು ಭೂಮಿಯೊಳಗೆ ಹಿಂಗುತ್ತಾ ಹೋಗುತ್ತದೆ. ಹೀಗೆ ಹಿಂಗಿದ ನೀರು ಛಳಿಗಾಲದಲ್ಲಿ, ಭೂಮಿಯಡಿಯ ಅರೆದ್ರಾವಣಾವಸ್ಥೆಯ ಶಿಲಾಪಾಕ(ಮ್ಯಾಗ್ಮ)ದ ಶಾಖ ಪ್ರಸರಣದಿಂದ, ಬಹುಬೇಗನೆ ಬಿಸಿಯಾಗುತ್ತದೆ. ಬಿಸಿಯಾದ ನೀರು ಭೂಮಿಯಲ್ಲಿನ ಕೊಳಾಯಿ ವ್ಯವಸ್ಥೆಯಲ್ಲಿ ಹರಿದಾಡಲು ಪ್ರಾರಂಭಿಸಿ ಮೇಲೇರಿ ಬರುತ್ತಾ ಭೂರಂದ್ರಗಳು, ಬಿರುಕುಗಳ ಮೂಲಕ ಚಿಮ್ಮಿ ಹೊರಹರಿಯುತ್ತದೆ. ಇಲ್ಲಿ ಹೀಗೆ ನಡೆಯುವ ಪ್ರಕ್ರಿಯೆಯಿಂದಾಗಿ ಶಿಲಾಪಾಕದಿಂದ ಉತ್ಪತ್ತಿಯಾಗಿ ಮೇಲೇರಿ ಬರುವ ಅನಿಲಗಳು ಕಾರ್ಬನ್ ಡೈಯಾಕ್ಸೈಡ್ನೊಡನೆ ಬೆರೆಯುತ್ತವೆ. ಹೀಗೆ ಬೆರೆಯುವ ಸ್ವಲ್ಪ ಕಾರ್ಬನ್ ಡೈಯಾಕ್ಸೈಡ್ ಬಿಸಿನೀರಿನಲ್ಲಿ ಕರಗಿ ದುರ್ಬಲ ಕಾರ್ಬಾನಿಕ್ ಆಮ್ಲ ಉತ್ಪತ್ತಿಯಾಗುತ್ತದೆ. ಆದರಿಲ್ಲಿ, ಮ್ಯಾಮ್ಮತ್ ಹಾಟ್ ಸ್ಪ್ರಿಂಗ್ ಪ್ರದೇಶದಲ್ಲಿ ಬಿಸಿಯಾದ ಆಮ್ಲ ದ್ರಾವಣ ಕೊಳಾಯಿ ಕಲ್ಲು ಸಂದುಗಳ ಮೂಲಕ ಮೇಲೇರಿ ಬರುವಾಗ ಅತಿಯಾದ ಸುಣ್ಣದ ಖನಿಜಾಂಶವನ್ನು ಕರಗಿಸಿಕೊಂಡು ಬಂದು ಬಿಸಿನೀರ ಬುಗ್ಗೆಗಳಾಗಿ ಚಿಮ್ಮುತ್ತದೆ. ಚಿಮ್ಮುತ್ತಾ ಭೂಮಿ ಮೇಲೆ ಬಂದ ಬಿಸಿನೀರು ಹೊರಗಾಳಿಗೆ ಬೀಳುತ್ತದೆ, ಈ ಸಮಯದಲ್ಲಿ ಕೆಲವಂಶ ಕಾರ್ಬನ್ ಡೈಆಕ್ಸೈಡ್ ದ್ರಾವಣದಿಂದ ತಪ್ಪಿಸಿಕೊಳ್ಳುತ್ತದೆ. ಕಾರ್ಬನ್ ಡೈಆಕ್ಸೈಡ್ ಇಲ್ಲದೆ ಸುಣ್ಣದ ಖನಿಜಾಂಶ ದ್ರಾವಣದಲ್ಲಿ ಉಳಿಯುವುದಿಲ್ಲ. ಹಾಗಾಗಿ ಅದು ಗಟ್ಟಿಯಾದ ಕ್ಯಾಲ್ಸಿಯಮ್ ಕಾರ್ಬೊನೇಟ್ ಖನಿಜವಾಗಿ ಹಿಂದಿರುಗಿ ಪುನಃ ಬದಲಾಗುತ್ತದೆ. ಈರೀತಿ ಬದಲಾದ ಬಿಳಿ ಸುಣ್ಣವು ಸಾಂದ್ರೀಕೃತವಾಗಿ ಸೇರಿ ಬೆಳೆಯುತ್ತಾ ಟ್ರ್ಯಾವರ್ಟೈನ್ ಆಗಿ ಪರಿವರ್ತಿತವಾಗಿ ಹಲವು ಅಂತಸ್ತುಗಳ ಮಹಡಿಗಳಂತೆ ಬೆಳೆಯುತ್ತವೆ/ಬೆಳೆಯುತ್ತಿವೆ.
![](https://blogger.googleusercontent.com/img/b/R29vZ2xl/AVvXsEjbxNDtT-YY4f1VRn4vqzvYx7aF_vZmoCeFY1MwlLuqRpIGi4dbvtGlQjVBGe5w9nzmB0RTsZP8Tshrl2LqvvSvFxwpK3nfWXUajIzSG7QeX6lybWMfVo7fFHxV3TTCKGZjmgjvSuGodWG7bk2Iq2-70jbV_7QT4stm3vC422C2WT_ioRg6Boeo79KAYw/s320/DSC_0685.JPG) |
ಟ್ರ್ಯಾವರ್ಟೈನ್ ಬೆಟ್ಟದ ಒಂದು ನೋಟ |
ಮ್ಯಾಮ್ಮತ್ ಹಾಟ್ ಸ್ಪ್ರಿಂಗ್ ಪ್ರದೇಶ ಯೆಲ್ಲೊಸ್ಟೋನ್ "ಕಾಲ್ಡೆರ"ದಿಂದ ಹೊರಕ್ಕುಳಿದಿದೆ. ಆದರೆ ವಿಜ್ಞಾನಿಗಳು, ನೋರಿಸ್ ಗೈಜ಼ರ್ ಬೇಸಿನ್ ಪ್ರಾಂತದ ಬಿಸಿನೀರ ಬುಗ್ಗೆಗಳ ನೆಲದಡಿಯಲ್ಲಿನ ಮ್ಯಾಗ್ಮಾವು ಶಿಥಿಲಾವಲಯಗಳ(faults’) ಮೂಲಕ ಮ್ಯಾಮ್ಮತ್ ಹಾಟ್ ಸ್ಪ್ರಿಂಗ್ ಪ್ರದೇಶದವರೆಗೂ ಹಬ್ಬಿಕೊಂಡು ಅಲ್ಲಿ ಬಿಸಿನೀರ ಬುಗ್ಗೆಗಳಾಗಿ ಹೊರಹೊಮ್ಮಿರುತ್ತವೆಂಬ ಅಭಿಪ್ರಾಯವನ್ನೂ ಹೊಂದಿದ್ದಾರೆ. ಮತ್ತೆಲ್ಲೆಲ್ಲಿ ಶಿಥಿಲಾವಲಯಗಳಿವೆಯೋ ಅಲ್ಲೆಲ್ಲಾ ಬುಗ್ಗೆಗಳು ಉದ್ಭವಿಸಿವೆಯೆಂದೂ ವಿಜ್ಞಾನಿಗಳು ಭಾವಿಸಿದ್ದಾರೆ. ಇಲ್ಲಿ ಪ್ರವಾಸಿಗರ ಜನಸಂದಣಿ ಓಲ್ಡ್ ಫ಼ೇತ್ಫು಼ಲ್ನ ಪ್ರದೇಶದಲ್ಲಿದ್ದಂತೆ ಇರಲಿಲ್ಲ. ವಿರಳವಾಗಿದ್ದಿತು. ಇಲ್ಲಿದು ಎರಡು ಮರದಟ್ಟಣಿಗೆಗಳ ನಡೆದಾರಿಯುಳ್ಳದ್ದಾಗಿದೆ… ಮೇಲಂತಸ್ತು ಮತ್ತು ಕೆಳಂತಸ್ತುಗಳಾಗಿ ವಿಭಜಿಸಿದೆ, ಎರಡೂ ಸೇರಿ ಒಂದೂಮುಕ್ಕಾಲು ಮೈಲುದ್ದದ ಅಟ್ಟಣಿಗೆ ದಾರಿಗಳು. ಮೇಲಂತಸ್ತಿನ ಅಟ್ಟಣಿಗೆ ಉದ್ದವಿದ್ದು ಅದರ ನಡಿಗೆ ದಾರಿಯಲ್ಲಿ… ವೈಟ್ ಎಲಿಫೆ಼ಂಟ್, ಲಿಟಲ್ ಬರ್ಪರ್ ಸ್ಪ್ರಿಂಗ್, ಆರೆಂಜ್ ಸ್ಪ್ರಿಂಗ್ ಮೌಂಡ್, ನ್ಯೂ ಹೈಲ್ಯಾಂಡ್ ಟೆರೇಸ್, ಹೈಲ್ಯಾಂಡ್ ಸ್ಪ್ರಿಂಗ್, ಗ್ಯಾಸ್ಸಿ ಸ್ಪ್ರಿಂಗ್, ಮತ್ತು ನ್ಯೂ ಬ್ಲೂ ಸ್ಪ್ರಿಂಗ್ ಗಳನ್ನು ನೋಡಬಹುದು. ಅವುಗಳಲ್ಲಿ ಕೆಲವು ತಟಸ್ಥಗಿತವಾಗಿದ್ದವು. ಕಳಂತಸ್ತಿನ ಅಟ್ಟಣಿಗೆ ದಾರಿಯಲ್ಲಿ ಮಿನರ್ವಾ ಟೆರೇಸ್, ಲಿಬರ್ಟಿ ಕ್ಯಾಪ್ ಹಾಟ್ ಸ್ಪ್ರಿಂಗ್ ಕೋನ್(ತಟಸ್ಥಗಿತ), ಪೆಲೆಟ್ ಸ್ಪ್ರಿಂಗ್, ಮತ್ತು ಡೆವಿಲ್ಜ಼್ ತಂಬ್ಗಳನ್ನು ನೋಡಬಹುದು. ಬಹುತೇಕ ತಟಸ್ಥಗಿತವು.
![](https://blogger.googleusercontent.com/img/b/R29vZ2xl/AVvXsEigCYiBYGyi-YoXrMM4O4cBGXbh5TqGCKF8er2dJ5gzjzb3YeLkNU-INvk-zOxaa_vahjpLsPi0NcWCuC1MYR-FJ8T2qmHf6Y91xpZG8xLSNjF9ScCnRu9aRn8mvD3RwUq4wf-jpDb3NguYdli08tkBKWHny_vTmcdoGw_hGjdbkQbV9WuTcIUsGJSA5Q/s320/DSC_0689.JPG) |
ಟ್ರ್ಯಾವರ್ಟೈನ್ ಅಟ್ಟಣಿಗೆಗಳು |
ನಲವತ್ತು ನಿಮಿಷಗಳೊಳಗಾಗಿ ಬೇಗಬೇಗನೆ ಬೆಳಕಿರುವ ಮೊದಲೇ ಎರಡೂ, ಮೇಲಂತಸ್ತು ಮತ್ತು ಕೆಳಂತಸ್ತು, ಟ್ರ್ಯಾವರ್ಟೈನ್ ಪ್ರದೇಶಗಳ ವೀಕ್ಷಣೆ ನಡೆಸಿ ಚಿತ್ರಗಳನ್ನು ತೆಗೆದುಕೊಂಡು ಕಾರು ಪಾರ್ಕ್ ಮಾಡಿದ ಪ್ರದೇಶ ತಲುಪಿದೆವು. ಈ ಪ್ರದೇಶದಲ್ಲಿ ಅಲ್ಲಲ್ಲಿ ಎಲ್ಕ್ಗಳು, ಜಿಂಕೆ ಜಾತಿಯ ಪ್ರಾಣಿಗಳು ಯಾವ ಅಡಚಣೆಗಳಿಗೂ, ಜನಸಂದಣಿಗೆಗೂ ಬೆದರದೆ ಆಯಾಗಿ ಓಡಾಡಿಕೊಂಡಿದ್ದವು. ವೇಳೆ ರಾತ್ರಿಯ 8.30 ಗಂಟೆಯಾಗಿದ್ದಿತು, ಇನ್ನೂ ಸಂಜೆ ಬೆಳಕಿದ್ದಿತು. ಊಟಕ್ಕಾಗಿ ಲೂಪ್ ರಸ್ತೆಯಲ್ಲಿರುವ ಯೆಲ್ಲೊಸ್ಟೋನ್ ಫ಼ೋರ್ಟ್ ಟೌನ್ಶಿಪ್ ಮತ್ತು ಅದಕ್ಕೆ ಹೊಂದಿಕೊಂಡಂತೆ ಕೆಳಂತಸ್ತಿನ ಕಡೆಗೆ ಎಡಭಾಗಕ್ಕಿರುವ "ಮ್ಯಾಮ್ಮತ್ ಡೈನಿಂಗ್ ರೂಮ್"ನಲ್ಲಿ ಪಿಜ಼್ಜ಼ಾ ಮತ್ತು ಬರ್ಗರ್ಗಳನ್ನು ಪಡೆದು ತಿಂದು ಟೊಯ್ಲೆಟ್ ಮುಗಿಸಿ ಅಲ್ಲಿಂದ ಹೊರಡುವ ವೇಳೆಗೆ ರಾತ್ರಿ 8.59 ಗಂಟೆ. ರಿಪೇರಿಯಾಗುತ್ತಿದ್ದ ರಸ್ತೆಯನ್ನು ರಾತ್ರಿ 9.30 ಗಂಟೆಯೊಳಗೆ ದಾಟಬೇಕಾಗಿತ್ತು.
![](https://blogger.googleusercontent.com/img/b/R29vZ2xl/AVvXsEgbxiRBorU1RPqCZa0mWRtMvnzfc23Gl1oU1TtRVshBeWtEPQDBzzckY4MmDoxSEvlf9ilmk_7z1CaVR9tHAlfCPujORtijBs484gnFruQlyxf5a19TlZn1zgmzCK_3v1njX5lfmkeu5NaxzM24rhhjIUQkp3W9cidUGfHoWFXVM6TBn0ZI8oAadC7nBg/s320/DSC_0674.JPG) |
ಟ್ರ್ಯಾವರ್ಟೈನ್ ಬೆಟ್ಟದ ಇನ್ನೊಂದು ನೋಟ |
ಸಂಚಾರ ವಿರಳವಾಗಿತ್ತು. ನಮ್ಮ ಯೆಲ್ಲೊಸ್ಟೋನ್ ಪ್ರವಾಸ ಅಲ್ಲಿಗೆ ಮುಕ್ತಾಯವಾಗಿತ್ತು. ಹಿಂದಿರುಗಲು ಚಿನ್ಮಯಿ… ಪಶ್ಚಿಮ ದ್ವಾರದ ರಸ್ತೆ ಆರಿಸಿಕೊಂಡಿದ್ದಳು, ಮುಂದಿನ ಪಯಣ, ಐಡಾಹೊ ರಾಜ್ಯದ ರೆಕ್ಸ್ಬರ್ಗ್ ನಗರವಾಗಿತ್ತು, ಅಲ್ಲಿ ರಾತ್ರಿ ತಂಗಣೆ. ಸುಮಾರು ಮೂರು ಗಂಟೆ ಪ್ರಯಾಣ. ದಾರಿಯಲ್ಲಿ ಸಿಕ್ಕ ಟೊಲ್ ಒಂದನ್ನು ದಾಟಿದ ಮೇಲೆ ಆಹಾರದ ಸ್ಟಾಲ್ವೊಂದರಲ್ಲಿ ಮತ್ತಷ್ಟು ತಿನ್ನಲು ಕುಡಿಯಲು ಕೊಂಡಾಯಿತು. ರೆಕ್ಸ್ಬರ್ಗ್ನಲ್ಲಿ ನಾವುಳಿದುಕೊಳ್ಳಲು, ಚಿನ್ಮಯಿ, ಒಂದು "ಸ್ಟೇ ಹೋಂ," ನಿಗದಿಪಡಿಸಿದ್ದಳು, ಅದರ ಯಜಮಾನ ಬೀಗದ ಕೀಯನ್ನು ಮುಂಬಾಗಿಲಿನ ಕಾಲದಿಕೆಯಡಿ ಇರಿಸಿರುವುದಾಗಿ ಒಸಗೆ ಕಳುಹಿಸಿದ್ದರು. ನಾವು ಅಲ್ಲಿಗೆ ತಲುಪಿದಾಗ ಆಗಸ್ಟ್ 30, 2018 ಮಧ್ಯರಾತ್ರಿಯನಂತರ ಒಂದು ಗಂಟೆಯಿದ್ದಿರಬಹುದು!?
ಬೆಳಗ್ಗೆ ನಾವು ಹೊರಡುವ ವೇಳೆ… "ಸ್ಟೇ ಹೋಂ"ನ ಬಾಗಿಲಿನ ಕೀಯನ್ನು ಅದು ಎಲ್ಲಿ ದೊರೆತಿತ್ತೋ ಅಲ್ಲಿಯೇ ಇಟ್ಟಿದ್ದೆವು. ಮುಂದಿನ ಪ್ರಯಾಣ, ರೆಕ್ಸ್ಬರ್ಗ್ನಿಂದ ಹಿಂದಿರುಗಿ ಸಾಲ್ಟ್ಲೇಕ್ ಸಿಟಿ, ಮುಂದೆ ಪ್ರವಾಸ ವಾಷಿಂಗ್ಟನ್ ಡಿ.ಸಿ., ನ್ಯೂಯಾರ್ಕ್ ಸಿಟಿ ಮತ್ತು ನಯಾಗರ ಜಲಪಾತಗಳು. ನನಗೆ… ಅವು ಸಾಮಾನ್ಯವಾಗಿ ನಗರ ಪ್ರದೇಶಗಳಾಗಿದ್ದುದರಿಂದ ಅವುಗಳ ಬಗ್ಗೆ ಆಸಕ್ತಿಯಿಲ್ಲದಿದ್ದುದರಿಂದ ಬರೆಯುವ ಗೊಡವೆಗೆ ಹೋಗಲಿಲ್ಲ.
ಬಾಲಂಗೋಚಿ: ಯೆಲ್ಲೊಸ್ಟೋನ್ ರಾಷ್ಟ್ರೀಯ ಉದ್ಯಾನದಲ್ಲಿ ವನ್ಯಜೀವಿಗಳು:
ಉದ್ಯಾನದಲ್ಲಿ ವಿಭಿನ್ನ ಗೈಜ಼ರುಗಳು ಇದ್ದಹಾಗೆ ವಿಭಿನ್ನ ವನ್ಯಜೀವಿಗಳಿವೆ. ಇಲ್ಲಿಯ ಮಾಹಿತಿಯ ಪ್ರಕಾರ 300 ಜಾತಿಯ /ಬಗೆ ಬಗೆಯ ಪಕ್ಷಿಗಳು, 16ಜಾತಿಯ ಮೀನುಗಳು, ಆರು ಜಾತಿಯ ಉರಗವರ್ಗ ಪ್ರಾಣಿಗಳು, ಆರು ಜಾತಿಯ ಆಂಫಿ಼ಬಿಯನ್ಸ಼್( ಕಪ್ಪೆ ಗುಂಪಿಗೆ ಸೇರಿದ), 67 ಜಾತಿಯ ಹಾಲುಣಿಸುವ ಪ್ರಾಣಿಗಳು… ಇವುಗಳಲ್ಲಿ ಸ್ಥಳೀಯ ಏಳು ಗೊರಸುಕಾಲಿನ ಪ್ರಾಣಿಗಳು ಸೇರಿವೆ, ಮತ್ತು ಎರಡು ಜಾತಿಯ ಕರಡಿಗಳು ಸೇರಿವೆ… ಗ್ರಿಜ್ಲಿ಼ ಮತ್ತು ಸ್ಲಾತ್ ಕರಡಿಗಳು. ಉದ್ಯಾನದಲ್ಲಿ ಅಲ್ಲಲ್ಲಿ ಪ್ರಾಣಿಗಳ ಬಗ್ಗೆ ತೆಗೆದು- ಕೊಳ್ಳಬಹುದಾದ ಎಚ್ಚರಿಕೆ ಮತ್ತು ತೆಗೆದುಕೊಳ್ಳಲಾಗುವ ಕಾನೂನು ಕ್ರಮಗಳ ನಿಯಮಗಳ ಫಲಕಗಳನ್ನು... ಅಲ್ಲಲ್ಲಿ, ಕಾಣುತ್ತೇವೆ.
ಈ ಪ್ರವಾಸ ಕಥನವನ್ನು ಬರೆದು ಎಂಟೊಂಬತ್ತು ತಿಂಗಳಾದರೂ ಬ್ಲಾಗಿಗೆ ಅಪ್ಲೋಡ್ ಮಾಡದೆ ಹಾಗೇ ಉಳಿಸಲಾಗಿತ್ತು. ಇದೀಗ ಅಂತಿಮವಾಗಿ ಪ್ರಕಟಿಸಲಾಗಿದೆ. ###
ಬರಹ: ದಿವಾಕರ ತಿಮ್ಮಣ್ಣ
ಚಿತ್ರಗಳು: ಡಾ||ಸಿಂಚನ ದಿವಾಕರ , ಚಿನ್ಮಯಿ ದಿವಾಕರ.
email: tdivakara@gmail.com
Comments
Post a Comment